സിനിമാപ്രേമികള്‍ ഏറെ കാത്തിരിക്കുന്ന “ബിഗ് ബി”യുടെ രണ്ടാം ഭാഗം “ബിലാല്‍” ഉടന്‍ എത്തുമെന്ന് സൂചന നല്‍കി സംഗീതസംവിധായകന്‍ ഗോപിസുന്ദറും. 2007-ല്‍ തിയേറ്ററുകളിലെത്തിയ ബിഗ് ബി അമല്‍ നീരദിന്റെ അരങ്ങേറ്റ ചിത്രമായിരുന്നു. വന്‍ ബോക്‌സോഫീസ് വിജയം നേടിയില്ലെങ്കിലും യുവാക്കള്‍ ചിത്രം ഏറ്റെടുത്തിരുന്നു.
മമ്മൂട്ടി ബിലാല്‍ ജോണ്‍ കുരിശിങ്കല്‍ എന്ന കഥാപാത്രമായെത്തിയ ചിത്രത്തിന്റെ രണ്ടാം ഭാഗം എത്തുമെന്ന് സംവിധായകന്‍ പ്രഖ്യാപിച്ചരുന്നു. ബിലാല്‍ ഉടന്‍ തന്നെ എത്തുമെന്ന് ഒന്നുകൂടി ഉറപ്പിച്ചിരിക്കുകയാണ്. അമല്‍ നീരദിനൊപ്പമുള്ള ചിത്രം പങ്കുവെച്ചാണ് ഗോപി സുന്ദര്‍ സിനിമയുടെ സംഗീതസംവിധാനത്തിലേക്ക് കടന്നതായുള്ള വാര്‍ത്ത പുറത്തു വിട്ടിരിക്കുന്നത്.
ബിഗ് ബിയുടെ തീം മ്യൂസിക് പങ്കുവെച്ച് ഗോപി സുന്ദര്‍ മറ്റൊരു കുറിപ്പും പങ്കുവെച്ചിട്ടുണ്ട്. “”2007-ല്‍ ഞാന്‍ ഈ ട്രാക്ക് സിനിമയ്ക്കു വേണ്ടി ചെയ്തു. അതിനു ശേഷം സ്‌റ്റൈല്‍ തന്നെ മാറ്റി. പതിമൂന്നു വര്‍ഷങ്ങള്‍ക്കു ശേഷം വീണ്ടും ഒരു അവസരം വന്നിരിക്കുകയാണ്. ഇത്രയും വര്‍ഷമെടുത്ത് എന്തു പഠിച്ചു എന്നത് തെളിയിക്കാന്‍.. ഇതിലെ ഓരോ ടെക്നീഷ്യനും അതൊരു വെല്ലുവിളി തന്നെയാണ്”” എന്നാണ് ഗോപി സുന്ദര്‍ കുറിച്ചിരിക്കുന്നത്.
Read more
മലയാളത്തിലെ മികച്ച ഒരു ഗ്യാംഗ്സ്റ്റര്‍ ചിത്രം കൂടിയാണ് ബിഗ് ബി. മനോജ് കെ ജയന്‍, ബോളിവുഡ് നടി നഫീസ അലി, സുമി നവാല്‍, പശുപതി, വിജയരാഘവന്‍, ഷെര്‍വീര്‍ വകീല്‍, ലെന, മമ്ത മോഹന്‍ദാസ്, സന്തോഷ് ജോഗി തുടങ്ങിയവരായിരുന്നു ചിത്രത്തിലെ മറ്റ് അഭിനേതാക്കള്‍.
