‘ആടുജീവിതം’ റിലീസിന് പിന്നാലെ ചിത്രത്തിന്റെ വ്യാജപതിപ്പും പുറത്ത്. സിനിമയുടെ വ്യാജപതിപ്പാണ് ഇപ്പോള്‍ ഇന്റര്‍നെറ്റില്‍ പ്രചരിച്ചു കൊണ്ടിരിക്കുന്നത്. കാനഡയിലാണ് ആടുജീവിതത്തിന്റെ വ്യാജപതിപ്പ് പുറത്തിറങ്ങിയിരിക്കുന്നത്. IPTV എന്ന പേരിലുള്ള ചാനലുകളിലൂടെയാണ് ഇത് എത്തിയിരിക്കുന്നത്.
പാരി മാച്ച് (Pari Match) എന്ന ലോഗോയോടയാണ് ഈ വ്യാജപതിപ്പ് പ്രചരിക്കുന്നത്. കായിക മത്സരങ്ങളില്‍ വാതുവെപ്പ് നടത്തുന്ന ഒരു കമ്പനിയാണ് ഇത് എന്നാണ് റിപ്പോര്‍ട്ടുകള്‍. കാനഡയിലും അമേരിക്കയിലും റിലീസ് ആയാലുടനെ സിനിമകളുടെ വ്യാജ പതിപ്പുകള്‍ പെട്ടെന്ന് തന്നെ ഇത്തരം IPTV എന്ന ചാനലില്‍ പ്രത്യക്ഷപ്പെടാറുണ്ട്.
അതേസമയം, ഗംഭീര പ്രതികരണങ്ങളാണ് ആടുജീവിതം സിനിമയ്ക്ക് ലഭിച്ചു കൊണ്ടിരിക്കുന്നത്. ആഗോളതലത്തില്‍ ചിത്രം 15 കോടിയോളം നേടി എന്നും റിപ്പോര്‍ട്ടുകളുണ്ട്. 7.75 കോടി രൂപയാണ് ചിത്രം ഇന്ത്യയില്‍ നിന്നും മാത്രം നേടിയത്. പൃഥ്വിരാജിന്റെ കരിയറിലെ ഏറ്റവും മികച്ച പ്രകടനമായാണ് ആടുജീവിതം വിലയിരുത്തപ്പെടുന്നത്.
16 വര്‍ഷത്തെ പ്രയത്‌നത്തിനൊടുവിലാണ് ബ്ലെസി ആടുജീവിതം സിനിമ യാഥാര്‍ഥ്യമാക്കിയത്. ബ്ലെസിയുടെ മേക്കിംഗിനും ഗംഭീര പ്രതികരണങ്ങളാണ് ലഭിച്ചു കൊണ്ടിരിക്കുന്നത്. ലോകത്തോര നിലവാരമുള്ള സിനിമ എന്ന പ്രശംസകളും ആടുജീവിതം പ്രശംസ നേടുന്നുണ്ട്.
