സാമൂഹിക, രാഷ്ട്രീയ വിഷയങ്ങളില്‍ ഉള്‍പ്പെടെ തന്റെ നിലപാടുകള്‍ വ്യക്തമാക്കാറുള്ള താരമാണ് ഷമ്മി തിലകന്‍. ഓണാഘോഷത്തെ തുടര്‍ന്ന് ഷമ്മി സോഷ്യല്‍ മീഡിയയില്‍ പങ്കുവച്ച ഒരു പോസ്റ്റ് ആണ് ഇപ്പോള്‍ ശ്രദ്ധ നേടുന്നത്. ബിഎംഡബ്ല്യു കാറിന് മുന്നില്‍ ചാരി നില്‍ക്കുന്ന ചിത്രമാണ് ഷമ്മി തിലകന്‍ പങ്കുവച്ചിരിക്കുന്നത്.
”തിരുവോണം കഴിഞ്ഞു..! തമ്പുരാന്‍ മാവേലിയെ യാത്രയാക്കി..! ഇനി….?!” എന്ന ക്യാപ്ഷനോടെ ഫെയ്‌സ്ബുക്കില്‍ പങ്കുവച്ച പോസ്റ്റിന് നിരവധി കമന്റുകളാണ് ലഭിക്കുന്നത്. ചിത്രത്തിന് താഴെ ഹായ് ചോദിച്ചെത്തിയവര്‍ക്കെല്ലാം താരം മറുപടി നല്‍കുന്നുണ്ട്. എന്നാല്‍ ‘ഈ കൊല്ലംകാരനുണ്ടോ ഹായ്’ എന്ന കമന്റിന് നല്‍കിയ രസകരമായ മറുപടിയാണ് വൈറലാകുന്നത്.
”അവിടുത്തെ എംഎല്‍എയെ വിളിച്ചു ചോദിക്കാതെ എങ്ങനെയാ ബ്രോ?” എന്നായിരുന്നു തമാശ രൂപേണ ഷമ്മിയുടെ മറുപടി. കൊല്ലം എംഎല്‍എയായ മുകേഷിനെ ചെറിയ കാര്യങ്ങള്‍ക്ക് പോലും ആളുകള്‍ വിളിച്ചു സഹായം ചോദിക്കുകയും ഈ കോളുകള്‍ റെക്കോര്‍ഡ് ചെയ്ത് സോഷ്യല്‍ മീഡിയയില്‍ വൈറലാക്കുകയും ചെയ്യാറുണ്ട്.
ഷമ്മി തിലകന്റെ ഈ മറുപടി സോഷ്യല്‍ മീഡിയ ഏറ്റെടുത്തിരിക്കുകയാണ്. ”ആ പച്ച കാറില്‍ കേറി ഒന്ന് പാതാളം വരെ പോയി നോക്കിയാലോ? ആള് അങ്ങെത്തിയോന്ന്” എന്ന കമന്റിന് ”പച്ചാളത്താണേല്‍ നോക്കാം” എന്നാണ് ഷമ്മിയുടെ മറുപടി.
