തന്റെ സിനിമയുടെ കഥ മോഷ്ടിച്ചാണ് ‘തുടരും’ സിനിമ ഒരുക്കിയതെന്ന് സംവിധായകന്‍ സനല്‍ കുമാര്‍ ശശിധരന്‍. തന്റെ ‘തീയാട്ടം’ എന്ന സിനിമയുടെ കഥ മോഷ്ടിച്ചാണ് തുടരും സിനിമ ആക്കിയിരിക്കുന്നത് എന്ന ഗുരുതര ആരോപണവുമായാണ് സനല്‍ കുമാര്‍ രംഗത്തെത്തിയിരിക്കുന്നത്. ”കൊന്നാല്‍ പാപം തിന്നാല്‍ തീരും” എന്ന തന്റെ തിരക്കഥയിലെ ഒരു ഡയലോഗും മോഷ്ടിച്ച് സിനിമയില്‍ ചേര്‍ത്തിട്ടുണ്ട്. മഞ്ജു വാര്യര്‍, ടൊവിനോ തോമസ്, മുരളി ഗോപി, സുധീര്‍ കരമന എന്നിവരെ പ്രധാന കഥാപാത്രങ്ങളാക്കി ഒരുക്കാനിരുന്ന സിനിമയാണ്. അവര്‍ തിരക്കഥ വായിച്ചിട്ടുള്ളതുമാണ് എന്നാണ് സംവിധായകന്‍ പങ്കുവച്ച കുറിപ്പില്‍ പറയുന്നത്.
സനല്‍ കുമാറിന്റെ ഫെയ്‌സ്ബുക്ക് കുറിപ്പ്:
തുടരും എന്ന സിനിമ കണ്ടു. 2020ല്‍ ഞാന്‍ എഴുതിയ തീയാട്ടം എന്ന സിനിമയുടെ ഉടുപ്പ് മോഷ്ടിച്ച് സിനിമയാക്കിയിരിക്കുന്നതാണ് തുടരും. അതിന്റെ ഉള്ള് എന്താണെന്ന് മനസിലാക്കാനുള്ള വിവരമില്ലാത്തതു കൊണ്ടോ തിരിച്ചറിയാത്ത രീതിയില്‍ മാറ്റിയെഴുതാന്‍ മനഃപൂര്‍വം ഒഴിവാക്കിയതോ കൊണ്ട് ഉള്ള് ഇപ്പോഴും ഭദ്രമാണ്. അമ്പി എന്ന ഓട്ടോറിക്ഷാ ഡ്രൈവറുടെ ഓട്ടോറിക്ഷയില്‍ ഒരാളെ കൊന്ന് അയാളുടെ തല അറുത്ത് വെച്ച ശേഷം അമ്പിയെ പൊലീസ് കുടുക്കുന്നതാണ് കഥ.
”കൊന്നാല്‍ പാപം തിന്നാല്‍ തീരും” എന്ന എന്റെ തിരക്കഥയിലെ ഒരു അവശ്യ ഡയലോഗ് ഒരാവശ്യവും ഇല്ലാഞ്ഞിട്ടും ഇതില്‍ പറയുന്നുണ്ട്. തെളിവുകള്‍ ഒന്നും ബാക്കിവെക്കാതെ മോഷ്ടിക്കാന്‍ വിദഗ്ധരായ കള്ളന്മാര്‍ പോലും ചില കൗതുകങ്ങള്‍ കൊണ്ട് സ്വയം മറന്നുപോകും. അതുപോലൊന്നാണ് ആ ഡയലോഗിന്റെ ഉപയോഗം എന്ന് തോന്നി.
മഞ്ജു വാര്യര്‍, ടൊവിനോ തോമസ്, മുരളി ഗോപി, സുധീര്‍ കരമന തുടങ്ങിയവര്‍ അഭിനയിക്കുന്ന സിനിമയായി സെഞ്ച്വറി പ്രൊഡക്ഷന്‍ അതിന്റെ നിര്‍മ്മാണം നടത്തുന്നതിനും ധാരണയായിരുന്നു. തിരക്കഥ ഇവരൊക്കെ വായിച്ചിട്ടുള്ളതുമാണ്. അഞ്ചു വര്‍ഷങ്ങള്‍ വലിയൊരു കാലയളവായതുകൊണ്ട് അവരത് മറന്നുപോയെക്കാന്‍ സാധ്യതയുണ്ട്. എന്റെ തിരക്കഥ ഉടന്‍ ഇവിടെ പ്രസിദ്ധീകരിക്കുന്നതാണ്.
Read more
