ബോളിവുഡിലെ മികച്ച അഭിനേതാക്കളിലൊരാളാണ് രണ്‍ദീപ് ഹൂഡ. താരത്തിന്റെ പുതിയ വെബ് സീരീസ് ഇന്‍സ്‌പെക്ടര്‍ അവിനാഷിനായുള്ള കാത്തിരിപ്പിലാണ് ആരാധകര്‍. ഇപ്പോഴിതാ പുറത്തുവരുന്ന റിപ്പോര്‍ട്ടുകള്‍ പ്രകാരം പുതിയ വെബ് സീരിസിന്റെ ചിത്രീകരണത്തിനിടയില്‍ അപകടമുണ്ടായതിനെ തുടര്‍ന്ന് ചികിത്സയിലാണ് താരം. ഇനി കുറച്ചു നാള്‍ രണ്‍ദീപ് ഹൂഡ ബെഡ് റെസ്റ്റിലായിരിക്കും.
കുതിര സവാരിക്കിടെ രണ്‍ദീപ് ബോധംകെട്ട് വീഴുകയായിരുന്നു. മുമ്പ് പൂര്‍ത്തിയാക്കിയ ബയോപിക് ചിത്രം ‘സ്വതന്ത്ര വീര്‍ സവര്‍ക്കറി’നു വേണ്ടി 22 കിലോ ശരീര ഭാരം താരം കുറച്ചിരുന്നു. ഇതിനെ തുടര്‍ന്ന് കാല്‍മുട്ടിന് ചുറ്റും പേശികളില്‍ ബലക്കുറവ് അനുഭവപ്പെടുകയുണ്ടായിരുന്നു.
ഇപ്പോഴുണ്ടായ വീഴ്ചയില്‍ കാല്‍മുട്ടിലും കാലിലും വലിയ ആഘാതം സൃഷ്ടിച്ചുവെന്നും ഇടതു കാലിനേറ്റ പരിക്കിനു ശസ്ത്രക്രിയ വേണ്ടി വന്നേക്കുമെന്നാണ് വാര്‍ത്ത. മുംബൈയിലെ കോകിലാബെന്‍ ധീരുഭായ് അംബാനി ആശുപത്രിയിലാണ് താരത്തെ പ്രവേശിപ്പിച്ചത്. അപകടമുണ്ടായ ഉടന്‍ തന്നെ ആശുപത്രിയില്‍ എത്തിച്ചിരുന്നു. പൂര്‍ണമായ വിശ്രമമാണ് ഡോക്ടര്‍മാര്‍ നിര്‍ദ്ദേശിച്ചിരിക്കുന്നത്.
സമീപകാലത്ത് നെറ്റ്ഫ്‌ള്കിസില്‍ റിലീസ് ചെയ്ത ‘ക്യാറ്റ്’ എന്ന വെബ് സീരിസിലെ പ്രകടനം വളരെ പ്രശംസ രണ്‍ദീപിന് നേടിക്കൊടുത്തിരുന്നു. ഫെബ്രുവരിയില്‍ തിയറ്ററിലെത്തുന്ന സ്വതന്ത്ര വീര്‍ സവര്‍ക്കറിനു വേണ്ടി കുറച്ചു കാലമായി കടുത്ത ഡയറ്റിലായിരുന്നു താരം.
Read more
വിനായക് ദാമോദര്‍ സവര്‍ക്കറുടെ ജീവിതം പറയുന്ന ചിത്രം മഹേഷ് വി. മഞ്ജരേക്കറാണ് സംവിധാനം ചെയ്യുന്നത്. ലണ്ടന്‍, മഹാരാഷ്ട്ര, ആന്‍ഡമാന്‍ എന്നിവിടങ്ങളിലെ വിവിധ ലൊക്കേഷനുകളിലായിരുന്നു ചിത്രത്തിന്റെ ഷൂട്ടിംഗ്.
