ഒരു മാസം പോലും നീണ്ടുനിൽക്കാത്ത ബന്ധമായിരുന്നു തന്റെ ആദ്യ വിവാഹമെന്ന് തുറന്നുപറഞ്ഞ് രേണു സുധി. സുധിചേട്ടൻ പറഞ്ഞതുകൊണ്ടാണ് ഇക്കാര്യം പുറത്തുപറയാതിരുന്നതെന്നും ഒരു യൂടൂബ് ചാനലിന് നൽകിയ അഭിമുഖത്തിൽ രേണു പറഞ്ഞു. ആളുകൾ പറയുന്നതുപോലെ തന്നെ ആദ്യം വിവാഹം കഴിച്ചയാൾ ഒരു പാസ്റ്റർ ആയിരുന്നില്ലെന്നും രേണു പറയുന്നു.

‘സുധിച്ചേട്ടനെ വിവാഹം ചെയ്യുന്നതിനു മുൻപ് ഞാൻ മറ്റൊരു വിവാഹം കഴിച്ചിട്ടുണ്ട്. സുധിച്ചേട്ടനും സുധിച്ചേട്ടന്റെ വീട്ടുകാർക്കുമൊക്കെ ഇതറിയാം. സുധിച്ചേട്ടൻ പറഞ്ഞതുകൊണ്ടാണ് ഞാൻ അക്കാര്യം പുറത്തു പറയാതിരുന്നത്. അല്ലെങ്കിൽ സ്റ്റാർ മാജിക്കിലടക്കം ഞാനത് പറയാനിരുന്നതാണ്. മുന്നിലോട്ടും പിന്നിലോട്ടുമൊക്കെ മനുഷ്യർക്ക് ജീവിതം ഉണ്ടാകും. മനുഷ്യരാണല്ലോ, അതൊന്നും ചികഞ്ഞ് പോകേണ്ട കാര്യമില്ല’, രേണു പറഞ്ഞു.

ഒരു മാസം പോലും നീണ്ടുനിൽക്കാത്ത ബന്ധമായിരുന്നു അതെന്നും ബിനു എന്നാണ് മുൻപ് വിവാഹം കഴിച്ചയാളുടെ പേരെന്നും രേണു വെളിപ്പെടുത്തി. ‘വിവാഹം ഔദ്യോഗികമായി രജിസ്റ്ററും ചെയ്തിട്ടില്ല. ആൾക്കിപ്പോൾ വേറെ ഭാര്യയും മക്കളുമുണ്ട്. അയൽവാസികൾ കൊണ്ടുവന്ന ആലോചന ആയിരുന്നു അത്. താത്പര്യമില്ലാതെയാണ് ആ വിവാഹം കഴിച്ചത്. പിന്നെ അത് വേണ്ടെന്നുവച്ചു. ആൾക്കും കുഴപ്പമില്ല, സുധിച്ചേട്ടനും കുഴപ്പമില്ല, അദ്ദേഹത്തിന്റെ വീട്ടുകാർക്കും കുഴപ്പമില്ല, പിന്നെ ആർക്കാണ് പ്രശ്നം”, രേണു സുധി ചോദിച്ചു.

‘ആളുകൾ പറയുന്നതുപോലെ മുൻഭർത്താവ് ഒരു പാസ്റ്റർ ആയിരുന്നില്ലെന്നും രേണു പറഞ്ഞു. ”പെന്തകോസ്ത് രീതിയിലുള്ള വിവാഹമായിരുന്നു അത്. പെന്തകോസ്ത് വിശ്വാസപ്രകാരം താലികെട്ടില്ല. അതുകൊണ്ടാണ് സുധിച്ചേട്ടനാണ് ആദ്യമായി എന്റെ കഴുത്തിൽ താലികെട്ടിയത് എന്ന് പറഞ്ഞത്. അല്ലാതെ ഞാനൊരു കള്ളവും പറഞ്ഞിട്ടില്ല’, രേണു സുധി അഭിമുഖത്തിൽ വ്യക്തമാക്കി.