വിവാഹത്തെ കുറിച്ചുള്ള ചിന്ത പേടിപ്പെടുത്തുന്നതാണെന്ന് നടി അര്‍ച്ചന കവി. 2016ല്‍ വിവാഹിതയായ താരം 2021ല്‍ വിവാഹമോചിതയായിരുന്നു. സ്റ്റാന്‍ഡ് അപ് കൊമേഡിയനായ അബീഷ് മാത്യു ആയിരുന്നു നടിയുടെ ഭര്‍ത്താവ്. ഇപ്പോള്‍ കല്യാണത്തെ കുറിച്ചുള്ള കാഴ്ചപ്പാട് എന്താണ്? എന്ന ചോദ്യത്തോടാണ് അര്‍ച്ചന പ്രതികരിച്ചത്.

തനിക്ക് അറിയില്ല. കല്യാണം എന്ന ചിന്ത തന്നെ പേടിപ്പെടുത്തുന്നതാണ്. അച്ചനാകാന്‍ പോകുന്നത് എല്ലാവര്‍ക്കുമുള്ളതല്ല, അതൊരു വിളിയാണെന്ന് പറയില്ലേ അതു പോലെയാണ് കല്യാണവും. അതൊരു വിളിയാണ്. എല്ലാവര്‍ക്കും പറ്റിയെന്ന് വരില്ല. നല്ല ഒരുപാട് ദമ്പതിമാരെ കണ്ടിട്ടുണ്ട്.

പക്ഷെ എല്ലാവരും ചെയ്യുന്നുണ്ടെന്ന് കരുതി നമ്മളും ചെയ്യണമെന്നില്ല എന്നാണ് അര്‍ച്ചന പറയുന്നത്. അതേസമയം, അബീഷുമായി വേര്‍പിരിഞ്ഞതിനെ കുറിച്ചും അര്‍ച്ചന സംസാരിക്കുന്നുണ്ട്. അബീഷും താനും പരസ്പരം വളരെ കംഫര്‍ട്ടബിളായിരുന്നു. പരസ്പരം അടുത്തറിയാം എന്നായിരുന്നു കരുതിയിരുന്നത്.

ഒരേ ഫീല്‍ഡ് എന്നതും പ്രധാനപ്പെട്ടതായിരുന്നു. പക്ഷെ ഒരുമിച്ച് ജീവിക്കാന്‍ തുടങ്ങിയപ്പോള്‍, കുടുംബമായപ്പോള്‍ വിവാഹം എന്നതിനെ കുറിച്ച് തങ്ങള്‍ രണ്ടു പേര്‍ക്കും ഉണ്ടായിരുന്ന കാഴ്ചപ്പാട് ഒന്നല്ല എന്ന് മനസിലായി. തന്റെ ചിന്താഗതിയും അവന്റെ ചിന്താഗതിയും വ്യത്യസ്തമായിരുന്നു.

താന്‍ കേരളത്തില്‍ നിന്നു കൊണ്ട് തന്റെ കരിയര്‍ നോക്കുകയും അവനെ വല്ലപ്പോഴും കാണുകയും ചെയ്യുകയാണെങ്കില്‍ അതിനോട് അവന് യോജിപ്പായിരിക്കും. പക്ഷെ താന്‍ ശീലിച്ചത് ഒരുമിച്ചുള്ള ജീവിതമാണ്. രണ്ട് തീര്‍ത്തും വ്യത്യസ്തമാണ്. പക്ഷെ രണ്ടു പേരും ശരിയുമാണ്. ഞങ്ങളുടെ ആവശ്യങ്ങള്‍ വ്യത്യസ്തമായിരുന്നു എന്നാണ് അര്‍ച്ചന പറയുന്നത്.