അഖില്‍ സത്യന്‍ സംവിധാനം ചെയ്ത ഫഹദ് ഫാസില്‍ ചിത്രം ‘പാച്ചുവും അത്ഭുതവിളക്കും’ അനുമോദനം നേടി മുന്നേറുകയാണ്. താന്‍ കണ്ടിട്ടുള്ള ഫഹദ് തമാശയൊക്കെ പറയുന്ന സാധാരണക്കാരനാണെന്നും ആ ഫഹദിനെ സിനിമയില്‍ കാണിക്കാന്‍ ശ്രമിക്കുകയായിരുന്നു താനെന്നും ദേശാഭിമാനി ദിനപത്രത്തിന് നല്‍കിയ അഭിമുഖത്തില്‍ അഖില്‍ പറഞ്ഞു.
‘ഞാന്‍ കണ്ടിട്ടുള്ള, എനിക്ക് പരിചയമുള്ള ഫഹദ് കാണുമ്പോള്‍ തമാശ പറയുന്ന വളരെ ലളിതമായ ഒരാളാണ്. അതേ ഫഹദിനെ സിനിമയിലും കാണിക്കാനാണ് ശ്രമിച്ചത്. ഫഹദിന്റെ വളരെ സങ്കീര്‍ണമായ കഥാപാത്രങ്ങള്‍ ആളുകള്‍ കണ്ട് മടുത്തു. ആരും ഗോളടിക്കാത്ത ഒരു പോസ്റ്റ് ഉണ്ട്. അച്ഛന്‍ യഥാര്‍ത്ഥത്തില്‍ അത് നന്നായി ഉപയോഗിച്ചിരുന്നതാണ്. അത് ഞാനും ഉപയോഗപ്പെടുത്താന്‍ ശ്രമിക്കുകയാണ്,’ അഖില്‍ പറഞ്ഞു.
. 2023ലെ ഫഹദ് ഫാസിലിന്റെ ആദ്യ ഹിറ്റായിരിക്കും ഈ ചിത്രം. ഏറെ നാളുകള്‍ക്ക് ശേഷം തിയേറ്ററുകളില്‍ തിരക്കേറുകയാണെന്നാണ് അനലിസ്റ്റുകളുടെ വാദം.
Read more
സത്യന്‍ അന്തിക്കാടിന്റെ മകന്‍ അഖില്‍ സത്യന്റെ ആദ്യ സംവിധാന സംരംഭമാണ് ‘പാച്ചുവും അത്ഭുതവിളക്കും’. അന്തരിച്ച നടന്‍ ഇന്നസെന്റ് അഭിനയിച്ച അവസാന ചിത്രമെന്ന പ്രത്യേകതയുണ്ട് ഈ ചിത്രത്തിന്. വിജി വെങ്കടേഷ്, അഞ്ജന ജയപ്രകാശ്, ധ്വനി രാജേഷ്, മുകേഷ്, വിനീത്, ഇന്ദ്രന്‍സ്, അല്‍ത്താഫ് സലിം, മോഹന്‍ അഗാഷെ തുടങ്ങിയവരാണ് ചിത്രത്തില്‍ മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്. ഫുള്‍ മൂണ്‍ സിനിമയുടെ ബാനറില്‍ സേതു മണ്ണാര്‍ക്കാട് ആണ് നിര്‍മ്മാണം.
