വളർത്തുമകളിൽ നിന്ന് ക്രൂരമായി മർദ്ദനമേറ്റതായി നടി ഷക്കീല. വളർത്തു മകളായ ശീതൾ ക്രൂരമായി മർദിക്കുകയും തള്ളിയിടുകയും ചെയ്തുവെന്നാണ് പരാതി. ഷക്കീലയുടെ അഭിഭാഷക സൗന്ദര്യയ്ക്കും മർദ്ദനമേറ്റതായി പരാതിയുണ്ട്.

സംഭവത്തെ തുടർന്ന് ഇരുവരെയും ചെന്നൈയിലെ ആശുപതിയിൽ പ്രവേശിപ്പിച്ചിരിക്കുകയാണ്. അഭിഭാഷകയുടെ പരാതിയെ തുടർന്ന് ശീതളിനെതിരെ പോലീസ് കേസ് എടുത്തിട്ടുണ്ട്. ഇന്നലെ വൈകിട്ടോടെ ചെന്നൈയിലെ കോടമ്പാക്കം യുണൈറ്റഡ് ഇന്ത്യ കോളനിയിലെ വീട്ടിൽ വച്ചാണ് സംഭവം നടന്നത്.

അതേസമയം, ഷക്കീല തങ്ങളെ അക്രമിച്ചെന്ന് കാണിച്ച് ശീതളിന്റെ ബന്ധുക്കളും പോലീസിൽ പരാതി നൽകിയിട്ടുണ്ട്. വഴക്കിനിടെ ഷക്കീലയെ ശീതൾ ആക്രമിക്കുകയും നിലത്ത് തള്ളിയിട്ട ശേഷം വീട്ടിൽ നിന്നിറങ്ങി പോവുകയും ചെയ്തു.

തുടർന്ന് പ്രശ്നം പരിഹരിക്കാനായി വിളിച്ച അഭിഭാഷകയെ ശീതൾ അധിക്ഷേപിച്ചു സംസാരിച്ചു. വീട്ടിലെത്തിയ ശീതളും ബന്ധുക്കളും അഭിഭാഷകയെ മർദിച്ചു എന്നാണ് ആരോപണം. സംസാരത്തിനിടെ ഷക്കീലയുടെ തലയിൽ ട്രേ കൊണ്ട് അടിച്ചുവെന്നും ശീതളിന്റെ അമ്മ അഭിഭാഷകയുടെ കൈ കടിച്ചു മുറിച്ചുവെന്നും പൊലീസിന് നൽകിയ പരാതിയിൽ പറയുന്നു.

സംഭവത്തിൽ പൊലീസ് പ്രാഥമിക അന്വേഷണം ആരംഭിച്ചു കഴിഞ്ഞു. സിസിടിവി ദൃശ്യങ്ങളടക്കം പരിശോധിച്ചു വരികയാണ്. കുടുംബ പ്രശ്നനങ്ങളാണ് മർദ്ദത്തിന് കാരണമെന്നാണ് റിപ്പോർട്ട്.