ലോക്‌സഭാ തിരഞ്ഞെടുപ്പില്‍ മത്സരിക്കുമെന്ന സൂചന നല്‍കി ബോളിവുഡ് താരം ഉര്‍വശി റൗട്ടേല. തന്റെ രാഷ്ട്രീയ പ്രവേശനത്തെ കുറിച്ച് ഇന്‍സ്റ്റന്റ് ബോളിവുഡിന് നല്‍കിയ അഭിമുഖത്തിലാണ് ഉര്‍വശി വെളിപ്പെടുത്തിയത്. തനിക്ക് തിരഞ്ഞെടുപ്പില്‍ മത്സരിക്കാനുള്ള ടിക്കറ്റ് കിട്ടിക്കഴിഞ്ഞു എന്നാണ് ഉര്‍വശി തുറന്നു പറഞ്ഞിരിക്കുന്നത്.
”എനിക്ക് ടിക്കറ്റ് കിട്ടിക്കഴിഞ്ഞു. ഇനി രാഷ്ട്രീയത്തില്‍ ഇറങ്ങണോ വേണ്ടയോ എന്ന് തീരുമാനിക്കണം. ഞാന്‍ രാഷ്ട്രീയത്തിലേക്ക് പോകുമോ ഇല്ലയോ എന്ന് എനിക്കറിയില്ല, പക്ഷേ ആരാധകരുടെ പ്രതികരണം അറിയാന്‍ ഞാന്‍ ആഗ്രഹിക്കുന്നു. ഞാന്‍ രാഷ്ട്രീയത്തില്‍ ചേരണോ വേണ്ടയോ എന്ന് അവര്‍ പറയണം” എന്നാണ് ഉര്‍വശി പറയുന്നത്.
എന്നാല്‍ ഏത് പാര്‍ട്ടിയെയാണ് തിരഞ്ഞെടുപ്പില്‍ പ്രതിനിധീകരിക്കുക എന്ന ചോദ്യത്തിന് കൂടുതല്‍ വെളിപ്പെടുത്താനാകില്ല, ഒരു ടിക്കറ്റ് കിട്ടിയിട്ടുണ്ട് എന്ന മാത്രമായിരുന്നു നടിയുടെ മറുപടി. താന്‍ ആരംഭിച്ച ഫൗണ്ടേഷന്‍ വഴി രാജ്യത്ത് മാറ്റങ്ങള്‍ കൊണ്ടുവരാനുള്ള പ്രവര്‍ത്തനങ്ങള്‍ ഇതിനോടകം ആരംഭിച്ചുവെന്നും ഉര്‍വശി വ്യക്തമാക്കി.
ഒരവസരം ലഭിച്ചാല്‍ രാജ്യത്തിന്റെ ഉന്നമനത്തിനായി പ്രവര്‍ത്തിക്കുമെന്നും സത്യസന്ധയായ രാഷ്ട്രീയക്കാരിയാവാനാണ് തനിക്ക് ആഗ്രഹം എന്നും ഉര്‍വശി റൗട്ടേല വ്യക്തമാക്കിയിട്ടുണ്ട്. അതേസമയം ‘ജെ.എന്‍.യു’ ആണ് ഉര്‍വശി റൗട്ടേലയുടേതായി പ്രഖ്യാപിച്ചിട്ടുള്ള ചിത്രം.
