സംവിധായികയും ആമിര്‍ ഖാന്റെ മുന്‍ ഭാര്യയുമായ കിരണ്‍ റാവുവിനെ പ്രശംസിച്ച് ബോളിവുഡ് താരം സല്‍മാന്‍ ഖാന്‍ രംഗത്തെത്തിയിരുന്നു. കിരണിന്റെ സംവിധാനത്തില്‍ ഒരുങ്ങിയ ‘ലാപതാ ലേഡീസ്’ എന്ന ചിത്രത്തെ പ്രശംസിച്ചു കൊണ്ടാണ് സല്‍മാന്‍ എക്‌സില്‍ പോസ്റ്റുമായി എത്തിയത്.
എന്നാല്‍ വമ്പന്‍ അബദ്ധത്തോടെയായിരുന്നു സല്‍മാന്‍ ഖാന്റെ ട്വീറ്റ്. കിരണ്‍ സംവിധാനം ചെയ്ത ആദ്യ ചിത്രമാണ് ലാപതാ ലേഡീസ് എന്നായിരുന്നു സല്‍മാന്‍ കുറിച്ചത്. എന്നാല്‍ 14 വര്‍ഷം മുമ്പാണ് കിരണിന്റെ ആദ്യ സിനിമ റിലീസ് ചെയ്യുന്നത്. 2011ല്‍ പുറത്തിറങ്ങിയ ‘ധോബി ഘട്ട്’ ആയിരുന്നു സംവിധായികയുടെ ആദ്യ ചിത്രം.
സല്‍മാന്റെ ട്വീറ്റ് വൈറലായതോടെ താരത്തെ ട്രോളി കൊണ്ടുള്ള കമന്റുകളും എത്തി. ഇതോടെ പോസ്റ്റ് പിന്‍വലിച്ച് മറ്റൊരു ട്വീറ്റ് സല്‍മാന്‍ പങ്കുവച്ചു. ”കിരണ്‍ റാവുവിന്റെ ലാപതാ ലേഡീസ് ഇപ്പോഴാണ് കണ്ടത്. വാഹ് വാഹ് കിരണ്‍. എനിക്ക് അത് വളരെ അധികം ഇഷ്ടപ്പെട്ടു.”
”എന്റെ അച്ഛനും. ഗംഭീരം. എനിക്കൊപ്പം എപ്പോഴാണ് വര്‍ക്ക് ചെയ്യുന്നത്?” എന്നാണ് സല്‍മാന്‍ കുറിച്ചത്. എന്നാല്‍ തെറ്റൊന്നും കിരണ്‍ റാവു കാര്യമാക്കിയില്ല. സല്‍മാന്റെ ആദ്യ പോസ്റ്റിന് താഴെ തന്നെ കിരണ്‍ മറുപടിയുമായി എത്തിയിരുന്നു. ഭായ് ഡേറ്റ് തന്നാല്‍ മതി, ഞാന്‍ റെഡിയാണ് എന്നാണ് കിരണ്‍ കുറിച്ചത്.
Just saw Kiran Rao’s Laapataa Ladies. Wah wah Kiran. I really enjoyed it n so did my father. superb job. Kab kaam karogi mere saath ?
— Salman Khan (@BeingSalmanKhan) March 14, 2024
