‘വിക്രം വേദ’യുടെ പരാജയത്തില്‍ പ്രതികരിച്ച് സെയ്ഫ് അലിഖാന്‍. തങ്ങളുടെ കണക്കുകൂട്ടലുകള്‍ തെറ്റിച്ചാണ് കളക്ഷന്‍ കണക്കുകള്‍ എത്തിയത് എന്നാണ് സെയ്ഫ് പറയുന്നത്. സെയ്ഫ് അലിഖാനും ഹൃത്വിക് റോഷനും ഒന്നിച്ച ചിത്രം ഏറെ പ്രതീക്ഷകളോടെയാണ് റിലീസ് ചെയ്തിരുന്നത്.

എന്നാല്‍ പ്രതീക്ഷിച്ചത്ര വിജയം ചിത്രത്തിന് നേടാനായില്ല. ഈ പശ്ചാത്തലത്തിലാണ് സെയ്ഫ് സംസാരിച്ചത്. ”പ്രേക്ഷകര്‍ക്ക് എന്ത് ഇഷ്ടപ്പെടുമെന്നോ ഇഷ്ടപ്പെടില്ലെന്നോ അറിയില്ല. എന്തെല്ലാമോ ഇവിടെ സംഭിക്കുന്നുണ്ട്, എന്താണെന്ന് കൃത്യമായി എനിക്ക് മനസിലാകുന്നില്ല.”

”ഞങ്ങളുടെ കണക്കുകൂട്ടലുകളെ തെറ്റിച്ചതായിരുന്നു കളക്ഷന്‍ കണക്കുകള്‍. ചിലവാക്കിയത് തിരികെ പിടിക്കാനായില്ല” എന്നാണ് സെയ്ഫ് ഒരു മാധ്യമത്തോട് പ്രതികരിച്ചിരിക്കുന്നത്. മാധവനും വിജയ് സേതുപതിയും കേന്ദ്ര കഥാപാത്രങ്ങളായി എത്തിയ സൂപ്പര്‍ ഹിറ്റ് തമിഴ് ചിത്രം വിക്രം വേദയുടെ ഹിന്ദി റീമേക്കാണ് ഈ സിനിമ.

തമിഴിലെ സംവിധായകരായ ഗായത്രി-പുഷ്‌കര്‍ ജോഡി തന്നെയാണ് ഹിന്ദിയിലും ചിത്രം സംവിധാനം ചെയ്തത്. റിലീസ് ചെയ്ത ആദ്യ ദിനം ആഗോളതലത്തില്‍ പത്തു കോടിക്ക് അടുത്ത് മാത്രമാണ് ചിത്രത്തിന് നേടാനായത്.

സമീപ കാലത്ത് ഇറങ്ങിയിട്ടുള്ള ബോളിവുഡ് ചിത്രങ്ങള്‍ ബോക്സോഫീസില്‍ പരാജയമായിരുന്നെങ്കിലും ഭേദപ്പെട്ട ഓപ്പണിംഗ് നേടിയിരുന്നു. 175 കോടി ബജറ്റില്‍ ഒരുക്കിയ ചിത്രം 135 കോടിയാണ് ഇതുവരെ നേടിയത്.