ആലിയ ഭട്ട്-രണ്‍വീര്‍ സിംഗ് ചിത്രം ‘റോക്കി ഓര്‍ റാണി കി പ്രേം കഹാനി’ മികച്ച കളക്ഷനാണ് ഇപ്പോള്‍ നേടിക്കൊണ്ടിരിക്കുന്നത്. ജൂലൈ 28ന് റിലീസ് ചെയ്ത ചിത്രം 80 കോടി രൂപയാണ് തിയേറ്ററുകളില്‍ നിന്നും നേടിയത്. ചിത്രത്തിലെ ഒരു ചുംബനരംഗമാണ് ഇപ്പോള്‍ ചര്‍ച്ചയായി കൊണ്ടിരിക്കുന്നത്.
കരണ്‍ ജോഹര്‍ സംവിധാനം ചെയ്ത ചിത്രത്തിലെ കഥ രണ്‍വീറിന്റെ റോക്കിയുടെയും റാണിയായ ആലിയയുടെ പ്രണയത്തിലൂടെയാണ് വികസിക്കുന്നത്. എന്നാല്‍ മുതിര്‍ന്ന നടന്‍ ധര്‍മേന്ദ്രയും നടി ശബാന ആസ്മിയും തമ്മിലുള്ള ചുംബന രംഗമാണ് ഇപ്പോള്‍ സോഷ്യല്‍ മീഡിയയിലെ ചൂടേറിയ ചര്‍ച്ച.
ഈ ചുംബന രംഗം വൈറലായതോടെ ഇതില്‍ പ്രതികരിച്ചിരിക്കുകയാണ് നടിയും ധര്‍മേന്ദ്രയുടെ ഭാര്യയുമായ ഹേമ മാലിനി. ഈ രംഗത്തെ കുറിച്ച് ചോദിച്ചപ്പോള്‍ ‘ഞാന്‍ ചിത്രം കണ്ടിട്ടില്ല’ എന്നാണ് ഹേമ മാലിനി പ്രതികരിച്ചത്. എന്നാല്‍ ഈ പ്രായത്തിലും ധര്‍മേന്ദ്രയുടെ അഭിനയത്തിന് കിട്ടുന്ന സ്വീകരണത്തില്‍ സന്തോഷമുണ്ടെന്ന് ഹേമ കൂട്ടിച്ചേര്‍ത്തു.
”ആളുകള്‍ സിനിമ ഇഷ്ടപ്പെട്ടുവെന്ന് എനിക്ക് ഉറപ്പുണ്ട്. ധരം ജിയെ ഓര്‍ത്ത് എനിക്ക് വളരെ സന്തോഷമുണ്ട്. കാരണം അദ്ദേഹം എപ്പോഴും ക്യാമറയ്ക്ക് മുന്നില്‍ നില്‍ക്കാന്‍ ഇഷ്ടപ്പെടുന്നു” എന്നാണ് ഹേമ മാലിനി പറഞ്ഞത്. ഈ രംഗത്തെ കുറിച്ച് ധര്‍മേന്ദ്രയും നേരത്തെ പ്രതികരിച്ചിരുന്നു.
”ഞാനും ഷബാനയും തമ്മിലുള്ള ചുംബന രംഗം പ്രേക്ഷകരെ അമ്പരപ്പിച്ചുവെന്ന് അറിഞ്ഞു. ശരിക്കും അത് അവര്‍ സ്വീകരിച്ചു എന്നത് എന്നെ സംബന്ധിച്ച് അപ്രതീക്ഷിതമാണ്. അത് പെട്ടെന്ന് സംഭവിച്ചതാണ്, അതിനാല്‍ തന്നെയാണ് അത് ഇത്രയും ഇംപാക്ട് ഉണ്ടാക്കിയതും.”
Read more
”അത് ചെയ്യുമ്പോള്‍ എനിക്കോ ശബാനയ്‌ക്കോ എന്തെങ്കിലും ചമ്മല്‍ തോന്നിയിരുന്നില്ല. ഞാന്‍ അവസാനമായി ഒരു ചുംബന രംഗം ചെയ്തത് നഫീസ അലിയ്ക്കൊപ്പം ലൈഫ് ഇന്‍ എ മെട്രോയിലാണ്, ആ സമയത്തും ആളുകള്‍ അത് അഭിനന്ദിച്ചിരുന്നു” എന്നാണ് ധര്‍മേന്ദ്ര ഒരു ചാനലിനോട് പ്രതികരിച്ചത്.
