കേരളത്തില്‍ സ്വര്‍ണവിലയില്‍ അരലക്ഷം എന്ന റിക്കാര്‍ഡ് ഇന്നു ഭേദിച്ചു. ചരിത്രത്തില്‍ ആദ്യമായാണ് ഒരു പവന് അരലക്ഷം രൂപ കടക്കുന്നത്. ഗ്രാമിന് 130 രൂപയും പവന് 1,040 രൂപയും വര്‍ധിച്ച് സ്വര്‍ണവില സര്‍വകാല റിക്കാര്‍ഡിലെത്തി.
ഇതോടെ ഗ്രാമിന് 6,300 രൂപയും പവന് 50,400 രൂപയുമായി.
അന്താരാഷ്ട്ര സ്വര്‍ണവില 2,234 ഡോളറും, രൂപയുടെ വിനിമ നിരക്ക് 83.37 ആണ്. 24 കാരറ്റ് സ്വര്‍ണക്കട്ടിക്ക് ബാങ്ക് നിരക്ക് കിലോഗ്രാമിന് 69 ലക്ഷം രൂപ ആയിട്ടുണ്ട്.
കഴിഞ്ഞ 10 വര്‍ഷത്തെ വില പരിശോധിച്ചാല്‍ സ്വര്‍ണത്തിന് മുപ്പതിനായിരം രൂപയുടെ വര്‍ധനയാണ് ഒരു പവനില്‍ ഉണ്ടായത്. 2015ല്‍ അന്താരാഷ്ട്ര സ്വര്‍ണവില 1300 ഡോളറിലും, പവന് വില 21,200 രൂപയിലും ഗ്രാം വില 2,650 രൂപയിലുമായിരുന്നത് ഇന്ന് 2,234 ഡോളറിലും, ഒരു പവന് സ്വര്‍ണവില 50,400 രൂപയിലും ഒരു ഗ്രാം സ്വര്‍ണത്തിന്റെ വില 6,300 രൂപയിലും എത്തി.
ഒരു പവന് സ്വര്‍ണാഭരണം ഇന്ന് വാങ്ങണമെങ്കില്‍ ഏറ്റവും കുറഞ്ഞ പണിക്കൂലി നികുതി ഹാള്‍മാര്‍ക്കിംഗ് ചാര്‍ജ് ഉള്‍പ്പെടെ 55,000 രൂപയ്ക്ക് അടുത്ത് കൊടുക്കണം.
ലോകത്തെ ഏറ്റവും വലിയ സാമ്പത്തികശക്തിയായ അമേരിക്ക സമീപഭാവിയിലെങ്ങും അടിസ്ഥാന പലിശനിരക്ക് കുറയ്ക്കില്ലെന്ന റിപ്പോര്‍ട്ടുകള്‍ പുറത്തു വന്നിരുന്നു. ഇതിന്റെ അടിസ്ഥാനത്തില്‍ ഡോളറിന്റെ മൂല്യവും അമേരിക്കന്‍ സര്‍ക്കാരിന്റെ കടപ്പത്രങ്ങളുടെ ആദായനിരക്കും താഴുകയാണ്.
Read more
ഈ സാഹചര്യത്തില്‍ സുരക്ഷിത നിക്ഷേപമായി കണ്ട്, നിക്ഷേപകര്‍ ഡോളറില്‍ നിന്നും ബോണ്ടില്‍ നിന്നും നിക്ഷേപം പിന്‍വലിച്ച് സ്വര്‍ണത്തിലേക്ക് ഒഴുക്കുന്നതാണ് വില വര്‍ധന കാരണമായത്. ഡിമാന്‍ഡ് കൂടിയതോടെ സ്വര്‍ണവില കുതിച്ച് ഉയരുകയായിരുന്നു.
