യൂട്യൂബിനെ നയിക്കാൻ നീൽ മോഹൻ

ലോകമെമ്പാടും ജനപ്രീതിയുള്ള വീഡിയോ സ്ട്രീമിങ് ആപ്ലിക്കേഷനാണ് യൂട്യൂബ്. ഗൂഗിളിന് കീഴിൽ 25 വർഷത്തെ സേവനം അവസാനിച്ച് യൂട്യൂബിന്റെ നിലവിലെ മേധാവിയായ സൂസന്‍ വൊജ്‌സ്‌കി കഴിഞ്ഞ ദിവസം സ്ഥാനമൊഴിഞ്ഞതോടെ ഇന്തോ-അമേരിക്കൻ പൗരനായ 49 കാരനായ നീൽ മോഹൻ ആണ് ഗൂഗിളിന് കീഴിലുള്ള ജനപ്രിയ വീഡിയോ സ്ട്രീമിങ് സേവനമായ യൂട്യൂബിന്റെ പുതിയ സിഇഒ ആയി എത്തുന്നത്. യുഎസ് ആസ്ഥാനമായി പ്രവർത്തിക്കുന്ന വമ്പൻ ടെക്ക് കമ്പനികളുടെ തലപ്പത്തുള്ള ഇന്ത്യൻ വംശജരായ സിഇഒമാരുടെ പട്ടികയിൽ ഇനി നീൽ മോഹനും ഉണ്ടാകും. സൂസന് ശേഷം യൂട്യൂബിൽ ഏറ്റവും സ്വാധീനമുള്ള വ്യക്തികൂടിയാണ് നീൽ മോഹൻ.

നിലവില്‍ യൂട്യൂബിന്റെ ചീഫ് പ്രൊഡക്ട് ഓഫീസറായ നീല്‍മോഹന്‍ 2008 മുതലാണ് ഗൂഗിളിന്റെ ഭാഗമായത്. 2015- ലാണ് അദ്ദേഹം ചീഫ് പ്രോഡക്റ്റ് ഓഫീസറായി നിയമിതനായത്. ലോകമേറ്റെടുത്ത യൂട്യൂബ് ഷോട്ട്സ്, മ്യൂസിക്, സബ്സ്ക്രിപ്ഷൻ ഓഫറുകൾ തുടങ്ങിയ യൂട്യൂബിന്റെ പ്രധാന ഫീച്ചറുകൾ ഉൾപ്പെടുത്തുന്നതിൽ നിർണായ പങ്കുവഹിച്ച ഒരാളാണ് നീൽ മോഹൻ. കാലിഫോർണിയയിലെ സ്റ്റാൻഫോർഡ് യൂണിവേഴ്സിറ്റിയിൽ നിന്നും ഇലക്ട്രിക്കൽ എഞ്ചിനീയറിംഗിൽ ബിരുദവും അതേ സർവകലാശാലയിൽ നിന്ന് എംബിഎയും അദ്ദേഹം പൂർത്തിയാക്കിയിട്ടുണ്ട്. മൈക്രോസോഫ്റ്റിലും സ്റ്റിച്ച് ഫിക്സ് , 23 ആൻഡ് മി എന്നിവയുടെ ബോർഡിൽ അം​ഗമായും നീൽ പ്രവർത്തിച്ചിട്ടുണ്ട്.

നീൽ മോഹന്റെ കീഴിൽ ഗൂഗിളിന്റെ പരസ്യ ബിസിനസ്സ് ഏറ്റവും വലുതും അതിവേഗം വളരുന്നതുമായ സംരംഭങ്ങളിൽ ഒന്നായി മാറിയിരുന്നു. ഇക്കാര്യങ്ങൾ എല്ലാം ഗൂഗിളിന്റെ മറ്റ് എതിരാളികൾ നിരീക്ഷിച്ചുകൊണ്ടേയിരുന്നു. 2011-ൽ തങ്ങളുടെ ഉൽപ്പന്ന ശ്രേണി മെച്ചപ്പെടുത്തുന്നതിന് വേണ്ടി ട്വിറ്റർ നീൽ മോഹന് മുൻപിൽ ഒരു വമ്പൻ ഓഫറുമായി മുന്നോട്ട് വന്നു. ആ ഓഫർ നീൽ മോഹൻ സ്വീകരിക്കുമെന്ന് പലരും വിശ്വസിച്ചു. എന്നാൽ അദ്ദേഹം അവസാനം അത് നിരസിച്ചു. തങ്ങളുടെ തുറുപ്പുചീട്ടിനെ കൈവിടാൻ ഗൂഗിളും ഒരുക്കമല്ലായിരുന്നു. അദ്ദേഹത്തെ ഗൂഗിളിൽ തന്നെ നിർത്താനായി 828 കോടി രൂപയുടെ സ്റ്റോക്ക് ഗ്രാന്റ് ആണ് ഗൂഗിൾ വാഗ്ദാനം ചെയ്തത്. ഇതോടെ ട്വിറ്ററിന്റെ ഓഫർ അദ്ദേഹം വേണ്ടെന്ന് വെക്കുകയായിരുന്നു.

യൂട്യൂബ് കമ്മ്യൂണിറ്റിയെക്കുറിച്ചും ഉപയോക്താക്കൾക്ക് എല്ലാ കാലത്തും എന്താണ് വേണ്ടതെന്നും മനസ്സിലാക്കുന്ന ഒരു മികച്ച ലീഡറാണ് എന്നാണ് സൂസൻ നീൽ മോഹനെ വിശേഷിപ്പിച്ചത്. താൻ സ്ഥാനം ഒഴിഞ്ഞതിന് ശേഷവും നീലിന് കീഴിൽ യൂട്യൂബിന്റെ ഏറ്റവും നല്ല ദിവസങ്ങളാണ് വരാൻ പോകുന്നതെന്നും അവർ കൂട്ടിച്ചേർത്തു. ഗൂഗിള്‍ ആരംഭിച്ച കാലം തൊട്ട് താന്‍ നീല്‍ മോഹനൊപ്പം പ്രവർത്തിച്ചിട്ടുണ്ട് . യൂട്യൂബിന് ഇനിയും ഒരുപാട് അവസരങ്ങള്‍ മുന്നിലുണ്ട്യൂ. യൂട്യൂബിനെ നയിക്കാന്‍ അനുയോജ്യനായ ഒരു വ്യക്തിയാണ് നീല്‍ മോഹനെന്നും സൂസന്‍ കൂട്ടിച്ചേർത്തു.