ഇന്ത്യന്‍ സൂപ്പര്‍ലീഗ് ഫുട്‌ബോളിലെ കഴിഞ്ഞസീസണുകളില്‍ സൂപ്പര്‍താരമായിരുന്ന ബ്രസീലിയന്‍ താരം മാഴ്‌സലിഞ്ഞോ പെരേര നോര്‍ത്തീസ്റ്റ് യുണൈറ്റഡില്‍. ലീഗില്‍ ഇതിനകം 11 മത്സരങ്ങള്‍ പൂര്‍ത്തിയാക്കി പത്താം സ്ഥാനത്തുള്ള നോര്‍ത്തീസ്റ്റ് അടുത്ത മത്സരങ്ങളില്‍ പോരാട്ടം ശക്തിപ്പെടുത്തുന്നതിന്റെ ഭാഗമായിട്ടാണ് മാഴ്‌സലീഞ്ഞോയെ കൊണ്ടുവന്നത്.
ഈ സീസണില്‍ ഐഎസ്എല്ലില്‍ ഇല്ലാതിരുന്ന താരത്തെ രാജസ്ഥാന്‍ യുണൈറ്റഡ് എഫ്‌സി യില്‍ നിന്നുമാണ് നോര്‍ത്തീസ്റ്റ് കൊണ്ടുവരുന്നത്. ലോണില്‍ ഈ സീസണ്‍ പൂര്‍ത്തിയാകുന്നത് വരെയാണ് മാഴ്‌സലീഞ്ഞോ നോര്‍ത്തീസ്റ്റില്‍ കളിക്കുക. കഴിഞഞ ഒരു സീസണ്‍ ഒഴികെ ഇന്ത്യന്‍ സൂപ്പര്‍ലീഗില്‍ മികച്ച പ്രകടനം നടത്തിയിട്ടുള്ള താരമാണ് മാഴ്‌സലീഞ്ഞോ.
ഐഎസ്എല്ലില്‍ 33 ഗോളുകളും 18 അസിസ്റ്റുകളും പേരിലുള്ള മാഴ്‌സലീഞ്ഞോ കഴിഞ്ഞ അഞ്ചു സീസണുകളിലായി 80 മത്സരങ്ങളാണ് കളിച്ചത്. 2016 സീസണില്‍ ഏറ്റവും കൂടുതല്‍ ഗോളുകള്‍ സംഭാവന ചെയ്തിട്ടുള്ള താരം 10 ഗോളുകള്‍ അടിച്ച് ഗോള്‍ഡന്‍ ബൂട്ടും നേടിയിട്ടുണ്ട്. പൂനെ സിറ്റി എഫ്‌സിയെ സെമിഫൈനലിലേക്ക് നയിച്ച താരം ആ സീസണില്‍ എട്ടു ഗോളും ഏഴ് അസിസ്റ്റും നടത്തുകയും ചെയ്തിരുന്നു. ഡല്‍ഹി ഡൈനാമോസിലൂടെ ഐഎസ്എല്ലില്‍ വന്ന താരം ഹൈദരാബാദ്, ഒഡീഷ, എടികെ ക്ലബ്ബുകളില്‍ കളിച്ചിട്ടുണ്ട്.
Read more
കഴിഞ്ഞ സീസണ്‍ താരത്തിന് അത്ര മെച്ചമല്ലായിരുന്നു. 16 മത്സരങ്ങളില്‍ രണ്ടു ഗോളുകള്‍ മാത്രമാണ് 34 കാരന്‍ താരത്തിന് കണ്ടെത്താന്‍ കഴിഞ്ഞത്. എന്നിരുന്നാലും താരത്തിന്റെ മികച്ച പാസുകളും ഫ്രീകിക്കുകളും ചോദ്യം ചെയ്യപ്പെടാത്തതാണ്. താരത്തിന്റെ തിരിച്ചുവരവ് നോര്‍ത്ത് ഈസ്റ്റിന് ഗുണകരമാകുമോ എന്നാണ് ഇനിയറിയേണ്ടത്.
