മോഹന്‍ ബഗാന്റെ മലയാളി സൂപ്പര്‍ താരം വിപി സുഹൈബുമായി കേരള ബ്ലാസ്റ്റേഴ്സ് കരാറിലെത്തിയതായി സൂചന. ഇംഗ്ലീഷ് മാധ്യമങ്ങളാണ് സുഹൈബ് ബ്ലാസ്റ്റേഴ്‌സിലെത്തിയതായി റിപ്പോര്‍ട്ട് ചെയ്യുന്നത്. സുഹൈബ് ഈസ്റ്റ് ബംഗാളിലേക്ക് പോകുമെന്നായിരുന്നു ഇതുവരെ ഊഹാപോഹം. എന്നാല്‍ ബ്ലാസ്‌റ്റേഴ്‌സിന്റെ ഓഫറെത്തിയതോടെ സുഹൈബ് കേരളത്തിലേക്ക് മടങ്ങാന്‍ തീരുമാനിക്കുകയായിരുന്നു.
യുനൈറ്റഡ് എസ് സിയിലൂടെ പ്രൊഫഷണല്‍ ഫുട്‌ബോള്‍ കരിയര്‍ ആരംഭിച്ച സുഹൈബ് പിന്നീട് രണ്ട് സീസണില്‍ ഗോകുലത്തിനായി ബൂട്ടു കെട്ടി. അവിടെ നിന്നും ഈസ്റ്റ് ബംഗാള്‍ സ്വന്തമാക്കിയ താരം അഞ്ച് മത്സരത്തില്‍ നിന്ന് അഞ്ച് ഗോള്‍ നേടി ശ്രദ്ധേയനായിരുന്നു. പിന്നീട് ലോണില്‍ ഗോകുലത്തിലെത്തിയ സുഹൈബിനെ കഴിഞ്ഞ സീസണില്‍ മോഹന്‍ ബഗാന്‍ റാഞ്ചുകയായിരുന്നു.
ബഗാനു വേണ്ടി നിര്‍ണായക ഗോളുകള്‍ നേടിയും ഗോളുകള്‍ ഒരുക്കിയും സുഹൈര്‍ ഈ സീസണില്‍ താരമായി. ബഗാനൊപ്പം ഐ ലീഗ് കിരീടത്തിലും സുഹൈര്‍ മുത്തമിട്ടു. നിലവിലെ ബ്ലാസ്റ്റേഴ്സ് പരിശീലകന്‍ കിബു വികൂനയായിരുന്നു സുഹൈബിനെ ബഗാനില്‍ പരിശീലിപ്പിച്ചത്.
Read more
പാലക്കാട് സ്വദേശിയായ സുഹൈര്‍ സന്തോഷ് ട്രോഫിയിലും കേരളത്തിനായി മികച്ച പ്രകടനം കാഴ്ച്ചവെച്ച താരമാണ്. 28-കാരനായ മലയാളി സ്‌ട്രൈക്കറുടെ ഈ വരവ് ബ്ലാസ്റ്റേഴ്‌സിന് ഏറെ ഗുണകരമാകുമെന്നാണ് വിലയിരുത്തപ്പെടുന്നത്.
