അണ്ടര് 17 ലോകകപ്പിലൂടെ ഇന്ത്യന് ഫുട്ബോള് പ്രേമികളുടെ മനസ്സില് ഇടംപിടിച്ച കോമള് തട്ടാലിനെ സ്വന്തമാക്കാന് കേരള ബ്ലാസ്റ്റേഴ്സ് ഒരുങ്ങുന്നതായി റിപ്പോര്ട്ട്. കോമളിന്റെ ഏജന്റുമായി ബ്ലാസ്റ്റേഴ്സ് പ്രതിനിധികള് ഇക്കാര്യത്തില് ചര്ച്ച തുടങ്ങിയെന്നും ബ്ലാസ്റ്റേഴ്സിന്റെ ഭാഗമാവാന് താരത്തിനും സമ്മതമാണെന്നുമാണ് റിപ്പോര്ട്ടുകള്. ജനുവരിയിലെ ട്രാന്സ്ഫര് വിന്ഡോയിലൂടെയായിരിക്കും കോമള് ബ്ലാസ്റ്റേഴ്സിലെത്തുക.
അണ്ടര് 17 ലോകകപ്പില് ഇന്ത്യന് ടീമില് ഉണ്ടായിരുന്ന താരമാണ് കോമള് തട്ടാല്. എന്നാല് ടൂര്ണമെന്റില് ആദ്യ മത്സരം മാത്രമാണ് താരം ഇന്ത്യക്കായി കളിച്ചത്. അമേരിക്കയുമായുളള മത്സരത്തിനു ശേഷം പിന്നീട് നടന്ന ഗ്രൂപ്പിലെ രണ്ടു മത്സരത്തിലും കോമളിനെ പുറത്തിരുത്തുകയായിരുന്നു.
കോച്ച് നോര്ട്ടണ് ഡി മറ്റോസുമായുള്ള അഭിപ്രായ വ്യത്യാസങ്ങളാണ് താരത്തിനു മറ്റു മത്സരങ്ങളില് നിന്നും പുറത്തിരുത്തിയത്. ഇന്ത്യന് ഫുട്ബോള് ഫെഡറേഷന്റെ കീഴില് യുവ കളിക്കാരെ ഉള്പ്പെടുത്തി ഐ ലീഗില് കളിക്കുന്ന ക്ലബായ ഇന്ത്യന് ആരോസിലും മറ്റോസാണു കോച്ച് എന്നതു കൊണ്ട് താരത്തിനു അവസരം ലഭിച്ചില്ല.
Read more
അടുത്തിടെ തുര്ക്കി ഉള്പ്പെടെയുള്ള ചില യൂറോപ്യന് രാജ്യങ്ങളിലെ ക്ലബുകള് താരത്തെ സ്വന്തമാക്കാന് വന്നുവെന്നും എന്നാല് ഐഎസ് എല്ലില് കൂടുതല് അവസരം കാത്തിരിക്കുന്നതിനാല് താരം അതു നിരസിച്ചുവെന്നും വാര്ത്തകളുണ്ടായിരുന്നു. എടികെയും പൂനെ സിറ്റിയും താരത്തെ സ്വന്തമാക്കാന് രംഗത്തുണ്ടെങ്കിലും ബ്ലാസ്റ്റേഴ്സിനാണ് കൂടുതല് സാധ്യത കല്പിക്കപ്പെടുന്നത്.