ബെംഗളൂരു എഫ്‌സിക്കെതിരായ നോക്കൗട്ട് പോരാട്ടത്തിനിടെ ഫ്രീകിക്ക് ഗോളിനെച്ചൊല്ലി പ്രതിഷേധിച്ച് ഗ്രൗണ്ട് വിട്ട കേരള ബ്ലാസ്റ്റേഴ്‌സിനെ പിന്തുണച്ച് എഫ്‌സി ഗോവ താരം അല്‍വാരോ വാസ്‌കസ്. ധീരമായൊരു തീരുമാനം എന്നാണ് ബ്ലാസ്റ്റേഴ്‌സിന് പിന്തുണയറിയിച്ച് അല്‍വാരോ വാസ്‌കസ് തന്റെ ഇന്‍സ്റ്റഗ്രാം സ്റ്റോറിയില്‍ കുറിച്ചത്.
ബെംഗളൂരു എഫ്‌സി- കേരള ബ്ലാസ്റ്റേഴ്‌സ് മത്സരത്തിന് ഇങ്ങനെയൊരു അവസാനം ഉണ്ടായത് നാണക്കേടാണ്. പക്ഷേ അത് ധീരമായൊരു തീരുമാനം കൂടിയായിരുന്നു. നീതിപൂര്‍വവും തുല്യതയുള്ളതുമായ മത്സരം നടത്താന്‍ സംഘാടകര്‍ മുന്നോട്ടു വരുമെന്നു പ്രതീക്ഷിക്കുന്നു- അല്‍വാരോ കുറിച്ചു.
2021-22 സീസണില്‍ കേരള ബ്ലാസ്റ്റേഴ്‌സിനായി കളിച്ച താരമാണ് വാസ്‌കസ്. ബ്ലാസ്റ്റേഴ്‌സിനായി 23 കളികളില്‍നിന്ന് എട്ട് ഗോളുകളും രണ്ട് അസിസ്റ്റും താരം നേടിയിട്ടുണ്ട്.
സംഭവത്തില്‍ റഫറിയെ വിമര്‍ശിച്ച് ബ്രസീലിയന്‍ സൂപ്പര്‍ താരം മാര്‍സലീഞ്ഞോയും നേരത്തെ രംഗത്തുവന്നിരുന്നു. ഫൗള്‍ ന്യായമായിരുന്നെങ്കിലും ഫ്രീകിക്ക് എടുക്കവേ പ്രതിരോധക്കോട്ട ഒരുക്കാന്‍ പോകുന്നതിനെ കുറിച്ചുള്ള നിര്‍ദേശം റഫറിക്ക് പറയാമായിരുന്നെന്നും അവിടെ റഫറിയ്ക്ക് പിഴവ് സംഭവിച്ചെന്നും മാര്‍സലീഞ്ഞോ കുറ്റപ്പെടുത്തി.
Read more
എന്റെ അഭിപ്രായത്തില്‍ ആ ഫൗള്‍ ന്യായമായിരുന്നു. എന്നാല്‍ കളിക്കാരനുമായി ആശയ വിനിമയം ചെയ്ത റഫറിയാണ് ചോദ്യങ്ങള്‍ നേരിടേണ്ടത്. ഫ്രീകിക്ക് എടുക്കവേ പ്രതിരോധക്കോട്ട ഒരുക്കാന്‍ പോകുന്നതായി റഫറിക്ക് പറയാമായിരുന്നു. അല്ലാതെ തീരുമാനം എടുക്കാന്‍ കിക്കെടുക്കുന്ന കളിക്കാരനോടല്ല ആവശ്യപ്പെടേണ്ടത- മാര്‍സലീഞ്ഞോ ട്വീറ്റ് ചെയ്തു.
