വെള്ളിയാഴ്ച ഹൊബാർട്ടിലെ ബെല്ലറിവ് ഓവലിൽ വെസ്റ്റ് ഇൻഡീസിനെതിരായ ആദ്യ ടി20 ഐയിൽ ഓസ്‌ട്രേലിയൻ ഓപ്പണിംഗ് ബാറ്റർ ഡേവിഡ് വാർണർ തൻ്റെ വിൻ്റേജ് മികച്ച പ്രകടനം കാഴ്ചവച്ചു. 36 പന്തിൽ 12 ബൗണ്ടറികളും ഒരു സിക്‌സും സഹിതം 70 റൺസാണ് താരം തൻ്റെ ഇന്നിംഗ്‌സിൽ നേടിയത്. അദ്ദേഹത്തിൻ്റെ തകർപ്പൻ ഇന്നിങ്സിന്റെ ബലത്തിൽ, ഓസ്‌ട്രേലിയ അവരുടെ നിശ്ചിത 20 ഓവറിൽ 213/7 എന്ന കൂറ്റൻ സ്‌കോർ നേടി.
മറുപടി ബാറ്റിങ്ങിനിറങ്ങിയ വെസ്റ്റ് ഇൻഡീസ് നിശ്ചിത 20 ഓവറിൽ 202/8 എന്ന നിലയിൽ പൊരുതി നോക്കിയെങ്കിലും ഓസ്‌ട്രേലിയ 11 റൺസിന് മത്സരം വിജയിച്ചു. ടി20 കരിയറിലെ 25-ാം അർധസെഞ്ചുറി നേടിയ വാർണർ പ്ലെയർ ഓഫ് ദി മാച്ച് ആയി. അവാർഡ് ലഭിച്ചതിന് ശേഷമുള്ള ചടങ്ങിൽ സംസാരിക്കവെ, 2024 ലെ ടി20 ലോകകപ്പിന് ശേഷം താൻ വിരമിക്കൽ പ്രഖ്യാപിക്കുമെന്ന് വെളിപ്പെടുത്തിയിരിക്കുന്നു.
“വിജയം നേടിയതിൽ സന്തോഷമുണ്ട്. ബാറ്റ് ചെയ്യാൻ നല്ല വിക്കറ്റായിരുന്നു ഇത്. അവസരങ്ങൾ പരമാവധി പ്രയോജനപ്പെടുത്തണം. സന്തോഷവും ഉന്മേഷവും അനുഭവിക്കുക, എനിക്ക് ആവേശം തോന്നുന്നു. എനിക്ക് ടി20 ലോകകപ്പ് കളിക്കാനും അവിടെ കരിയർ പൂർത്തിയാക്കാനും ആഗ്രഹമുണ്ട്. അടുത്ത 6 മാസത്തേക്ക് ഞങ്ങൾക്ക് ഒരു നീണ്ട യാത്രയുണ്ട്. ” മത്സരത്തിന് ശേഷമുള്ള അവതരണ ചടങ്ങിൽ വാർണർ പറഞ്ഞു.
Read more
ടി20 ലോകകപ്പ് 2024 ജൂൺ 01 മുതൽ വെസ്റ്റ് ഇൻഡീസിലും യുഎസ്എയിലും നടക്കും എന്നത് ശ്രദ്ധേയമാണ്. 2021 ടി20 ലോകകപ്പിൽ ഏഴ് ഇന്നിംഗ്‌സുകളിൽ നിന്ന് 289 റൺസുമായി ടൂർണമെൻ്റിലെ ഏറ്റവും കൂടുതൽ റൺസ് നേടിയ രണ്ടാമത്തെ താരമായി വാർണർ പ്ലെയർ ഓഫ് ദ ടൂർണമെൻ്റ് നേടിയിരുന്നു. ഓസ്‌ട്രേലിയയെ മറ്റൊരു ഐസിസി ട്രോഫി നേടാൻ സഹായിക്കുന്നതിലൂടെ തൻ്റെ അന്താരാഷ്ട്ര കരിയർ അവസാനിപ്പിക്കാൻ വാർണർ പ്രതീക്ഷിക്കുന്നു.
