ഐസിസി ടി20 ലോകകപ്പ് 2024ല്‍ ഏറെ പ്രതീക്ഷയോടെ കാത്തിരിക്കുന്ന ഇന്ത്യയും പാക്കിസ്ഥാനും തമ്മിലുള്ള മത്സരം ഇന്ന് ന്യൂയോര്‍ക്കിലെ നാസൗ കൗണ്ടി ഇന്റര്‍നാഷണല്‍ ക്രിക്കറ്റ് സ്റ്റേഡിയത്തില്‍ നടക്കും. സൂപ്പര്‍ ഓവറില്‍ യുണൈറ്റഡ് സ്റ്റേറ്റ്‌സ് ഓഫ് അമേരിക്കയോട് തോറ്റതോടെ മെന്‍ ഇന്‍ ഗ്രീന്‍ സമ്മര്‍ദ്ദത്തിലാണ്.
മറുവശത്ത്, ന്യൂയോര്‍ക്ക് പിച്ചില്‍ ഇന്ത്യ അയര്‍ലന്‍ഡിനെതിരെ 8 വിക്കറ്റിന്റെ ജയം നേടി ആത്മവിശ്വാസത്തിലാണ്. ബാറ്റിംഗ് യൂണിറ്റില്‍, വിരാട് കോഹ്ലിയും രോഹിത് ശര്‍മ്മയും മത്സരത്തില്‍ ശ്രദ്ധ കേന്ദ്രീകരിക്കുന്ന രണ്ട് കളിക്കാരായിരിക്കും. എന്നാല്‍ പാകിസ്ഥാന്‍ മുന്‍ വിക്കറ്റ് കീപ്പര്‍ ബാറ്റര്‍ കമ്രാന്‍ അക്മല്‍ ടി20 നമ്പര്‍ വണ്‍ സൂര്യകുമാര്‍ യാദവിലാണ് കണ്ണുവെച്ചിരിക്കുന്നത്.
ഐസിസി ടി20 റാങ്കിംഗില്‍ സൂര്യ ഒന്നാമതെത്തിയെങ്കിലും സമീപകാലത്തെ അദ്ദേഹത്തിന്റെ ഫോം മികച്ചതായിരുന്നില്ല. ഇന്ത്യന്‍ പ്രീമിയര്‍ ലീഗില്‍ പോലും അവിസ്മരണീയമായ പ്രകടനങ്ങള്‍ സൂര്യ തന്റെ പേരില്‍ രേഖപ്പെടുത്തിയിട്ടില്ല. ഇപ്പോഴിതാ, ലോകത്തിലെ ഒന്നാം നമ്പര്‍ ടി20 ബാറ്റര്‍ താനാണെന്ന് തെളിയിക്കാന്‍ പാകിസ്ഥാനെതിരായ പോരില്‍ സൂര്യകുമാറിനെ വെല്ലുവിളിച്ചിരിക്കുകയാണ് കമ്രാന്‍ അക്മല്‍.
വിരാട് കോഹ്‌ലിയാണ് ഇന്ത്യയുടെ ഹീറോ. രണ്ടാമതായി സൂര്യകുമാറാണ്. എന്നാല്‍ ഇതുവരെ പാകിസ്ഥാനെതിരേ മികച്ചൊരു പ്രകടനം സൂര്യ നടത്തിയിട്ടില്ല. എന്നിട്ടും അവനെ ഇന്ത്യ ഉയര്‍ത്തിക്കാട്ടുന്നു. രോഹിത് ശര്‍മ പാകിസ്ഥാനെതിരേ ഐസിസി ടൂര്‍ണമെന്റുകളിലടക്കം റണ്‍സ് നേടി തെളിയിച്ച താരമാണ്.
ഇനി സൂര്യകുമാറിന്റെ അവസരമാണ്. അത്ര മികച്ചവനാണെങ്കില്‍ പാകിസ്ഥാനെതിരേ സ്‌കോര്‍ നേടൂ. പാകിസ്ഥാനെതിരേ കളിച്ചപ്പോഴൊന്നും മികച്ച സ്‌കോര്‍ നേടാന്‍ അവന് സാധിച്ചിട്ടില്ല. അവന് ക്ലാസിക് താരവും 360 ഡിഗ്രി താരവുമാണ്. അവന്റെ ബാറ്റിംഗ് ഒരു ആഘോഷമാണ്. ചെറിയ സമയംകൊണ്ട് ടീമിലെ സ്ഥാനം ഉറപ്പിക്കാന്‍ സാധിച്ചവനാണ് സൂര്യകുമാര്‍- കമ്രാന്‍ കൂട്ടിച്ചേര്‍ത്തു.
Read more
