ടി20യിലെ ഒന്നാം നമ്പര്‍ ബാറ്ററായ സൂര്യകുമാര്‍ യാദവ് എന്നാല്‍ ഏകദിനത്തില്‍ ഫോമില്ലാതെ ബുദ്ധിമുട്ടുകയാണ്. ഓസ്ട്രേലിയക്കെതിരായ ഏകദിന പരമ്പരയിലെ ആദ്യത്തെ രണ്ട് മത്സരത്തിലും സൂര്യകുമാര്‍ ഗോള്‍ഡന്‍ ഡെക്കായാണ് പുറത്തായത്. ഇപ്പോഴിതാ സൂര്യകുമാര്‍ മോശം പ്രകടനം തുടരുന്ന സാഹചര്യത്തില്‍ പകരക്കാരനെ ഇറക്കണമെന്ന നിലവിളികളോട് പ്രതികരിച്ച് രംഗത്തുവന്നിരിക്കുകയാണ് നായകന്‍ രോഹിത് ശര്‍മ്മ. രണ്ടാം ഏകദിനത്തിലെ നാണംകെട്ട തോല്‍വിയ്ക്ക് പിന്നാലെ മാധ്യമങ്ങളെ കാണുമ്പോഴായിരുന്നു രോഹിത്തിന്റെ പ്രതികരണം.
ശ്രേയസ് അയ്യര്‍ എന്ന് തിരിച്ചുവരുമെന്ന് അറിയില്ല. അതുകൊണ്ട് തന്നെ നാലാം നമ്പറില്‍ വിടവ് നന്നപ്പോള്‍ ടീമില്‍ ലഭ്യമായ താരമെന്ന നിലയില്‍ സൂര്യകുമാര്‍ യാദവിനെ കളിപ്പിച്ചു. പരിമിത ഓവറില്‍ വലിയ മികവ് കാട്ടാന്‍ കഴിവുള്ള താരമാണ് സൂര്യകുമാര്‍ യാദവ്.
മുമ്പ് പറഞ്ഞതുപോലെ തന്നെ വലിയ റണ്‍സ് നേടാന്‍ സാധിക്കുന്നവനാണവന്‍. വലിയ കരിയര്‍ സൃഷ്ടിക്കാന്‍ അധികം റണ്‍സ് നേടേണ്ടതായുണ്ട് അവനുമറിയാം. സൂര്യയെപ്പോലെയുള്ള പ്രതിഭയുള്ളവര്‍ രണ്ട് മത്സരത്തില്‍ ഫ്ളോപ്പായാലും അവരെ അത് ബാധിക്കില്ല.
അവസാന രണ്ട് മത്സരത്തില്‍ പൂജ്യത്തിനാണ് അവന്‍ പുറത്തായത്. എന്നാല്‍ 7-8 മത്സരങ്ങളിലൊന്നും ഇത്തരത്തില്‍ സംഭവിച്ചിട്ടില്ല. അതുകൊണ്ട് തന്നെ ഈ പ്രകടനം അവനെ അസ്വസ്തനാക്കില്ല. ആര്‍ക്കെങ്കിലും പരിക്കേറ്റാല്‍ നാലാം നമ്പറില്‍ അവനെത്തും. മാനേജ്മെന്റെന്ന നിലയില്‍ അവന്റെ പ്രകടനം വിലയിരുത്തിയാവും മുന്നോട്ടുള്ള യാത്ര തീരുമാനിക്കുക.
Read more
റണ്‍സ് വരാതെയും അവന്‍ അസ്വസ്തനാവുകയും ചെയ്യുന്ന സാഹചര്യത്തിലാവും മാറ്റത്തെക്കുറിച്ച് ചിന്തിക്കുക. ഇപ്പോള്‍ ഏതായാലും ആ വഴിയിലേക്ക് ചിന്തിക്കുന്നില്ല- രോഹിത് പറഞ്ഞു. ഏകദിനത്തില്‍ മികച്ച പ്രകടനം അവകാശപ്പെടാവുന്ന സഞ്ജു സാംസണെ പോലുള്ള മികച്ച കളിക്കാര്‍ പുറത്തുനില്‍ക്കുമ്പോഴാണ് സൂര്യകുമാറിനെ വീണ്ടും താങ്ങുന്നതെന്നാണ് ശ്രദ്ധേയം.
