പരിശീലനത്തിനിടെ തലയ്ക്ക് പന്ത് കൊണ്ടതിനെ തുടര്‍ന്ന് വിശ്രമത്തിലായിരുന്ന ഓസ്ട്രേലിയന്‍ താരം സ്റ്റീവ് സ്മിത്ത് രണ്ടാം കണ്‍കഷന്‍ ടെസ്റ്റും പാസായി. ഇതോടെ ഇംഗ്ലണ്ടിനെതിരായ ബാക്കി മത്സരങ്ങളില്‍ സ്മിത്തിന് കളിക്കാം. പരിക്കിനെ തുടര്‍ന്ന് ആദ്യ ഏകദിനത്തില്‍ നിന്ന് സ്മിത്ത് വിട്ടുനിന്നിരുന്നു.
ഇംഗ്ലണ്ടിനെതിയ ആദ്യ ഏകദിനത്തിനു മുമ്പുള്ള പരിശീലനത്തിനിടെ ഓസ്ട്രേലിയന്‍ കോച്ചിംഗ് സ്റ്റാഫിലെ ഒരാള്‍ എറിഞ്ഞ പന്ത് നെറ്റ്സില്‍ വെച്ച് സ്മിത്തിന്റെ തലയില്‍ തട്ടുകയായിരുന്നു. ഇതോടെ മുന്‍കരുതല്‍ നടപടിയെന്ന നിലയ്ക്ക് സ്മിത്തിനെ ആദ്യ ഏകദിനത്തില്‍ നിന്ന് മാറ്റി നിര്‍ത്താന്‍ ടീം മാനേജ്മെന്റ് തീരുമാനിക്കുകയായിരുന്നു.
ഒന്നാം ഏകദിനത്തില്‍ ഓസ്‌ട്രേലിയ 19 റണ്‍സിന് വിജയിച്ചിരുന്നു. ആദ്യം ബാറ്റുചെയ്ത ഓസ്‌ട്രേലിയ ഉയര്‍ത്തിയ 294 റണ്‍സ് വിജയലക്ഷ്യം പിന്തുടര്‍ന്നിറങ്ങിയ ഇംഗ്ലണ്ടിന് 275 റണ്‍സെടുക്കാനേ സാധിച്ചുള്ളൂ.
Read more
വിജയത്തോടെ മൂന്നു മത്സരങ്ങളുടെ പരമ്പരയില്‍ ഓസ്‌ട്രേലിയ 1-0ന് മുന്നിലെത്തി. അടുത്ത ഏകദിനം ഇന്ന് നടക്കും.
