'മമ്മൂട്ടിയ്ക്ക് സാധിക്കുമെങ്കില്‍ എനിക്കും സാധിക്കും, അതാണ് എന്റെ പ്രമാണം'

പ്രായവും കാലവും തോറ്റു പോകുന്ന വിസ്മയമാണ് മലയാളത്തിന്റെ പ്രിയ നടന്‍ മമ്മൂട്ടി. ആരെയും വെല്ലുന്ന സ്‌റ്റൈലും ഗെറ്റപ്പുമായി, മലയാളത്തിന്റെ ആണ്‍സൗന്ദര്യ സങ്കല്‍പ്പം ഇപ്പോഴും ആരാധകരുടെ പ്രിയപ്പെട്ട മമ്മൂക്ക തന്നെ. സോഷ്യല്‍ മീഡിയയിലൂടെ പുറത്തു വരുന്ന മമ്മൂട്ടിയുടെ പുതിയ ചിത്രങ്ങള്‍ എല്ലായ്‌പ്പോഴും തരംഗമാകാറുണ്ട്. ഇപ്പോഴിതാ നടന്‍ റഹമാന്‍ ഷെയര്‍ ചെയ്ത ചിത്രവും കുറിപ്പുമാണ് സോഷ്യല്‍ മീഡിയയില്‍ ശ്രദ്ധ നേടുന്നത്.

“മമ്മൂട്ടിയ്ക്ക് സാധിക്കുമെങ്കില്‍ എനിക്കും സാധിക്കും, അതാണ് എന്റെ പ്രമാണം” എന്നാണ് ജിമ്മില്‍ വര്‍ക്കൗട്ട് ചെയ്യുന്ന ചിത്രം പങ്കുവെച്ച് റഹമാന്‍ കുറിച്ചത്. ഫിറ്റ്‌നസിന്റെ കാര്യത്തില്‍ തനിക്ക് പ്രചോദനമാകുന്നത് മമ്മൂട്ടിയാണെന്ന് വ്യക്തമാക്കിയിരിക്കുകയാണ് റഹമാന്‍ ഇവിടെ. റഹമാന്‍ ഫെയ്‌സ്ബുക്കില്‍ പങ്കുവെച്ച പോസ്റ്റ് ഇതിനോടകം തന്നെ വൈറലായി കഴിഞ്ഞു.

എണ്‍പതുകളിലെ നിരവധി ചിത്രങ്ങളിലെ ഹിറ്റ് കോമ്പോ ആയിരുന്നു മമ്മൂട്ടിയും റഹമാനും. നിരവധി ഹിറ്റ് ചിത്രങ്ങളിലാണ് ഇരുവരും സഹോദരങ്ങളായും സുഹൃത്തായുമെല്ലാം വേഷമിട്ടത്. ഇരുവരും ഒന്നിച്ച രാജമാണിക്യം വമ്പന്‍ വിജയമായിരുന്നു നേടിയത്.