ഐപിഎലില്‍ ഒരു കിരീടമെന്ന ലക്ഷ്യത്തിലേക്ക് വളരെ അടുത്ത് എത്തിയിരിക്കുകയാണ് റോയല്‍ ചലഞ്ചേഴ്‌സ് ബെംഗളൂരു ടീം. ലഖ്‌നൗ സൂപ്പര്‍ ജയന്റ്‌സിനെതിരായ വിജയത്തോടെ അവര്‍ പ്ലേഓഫിലെ ക്വാളിഫയര്‍ 1 മത്സരത്തിന് യോഗ്യത നേടി. ഇനി ഈ മത്സരത്തില്‍ ജയിച്ചാല്‍ അവര്‍ക്ക് നേരിട്ട് ഫൈനലില്‍ എത്താം. ഫൈനലില്‍ എതിരാളികള്‍ക്കെതിരെ വിജയം നേടാനായാല്‍ വര്‍ഷങ്ങള്‍ നീണ്ട ആര്‍സിബിയുടെ കാത്തിരിപ്പിനാണ് വിരാമമാവുക. നിലവിലെ ടീമിനെ നോക്കുകയാണെങ്കില്‍ കിരീടം നേടാന്‍ കെല്‍പ്പുളള ഇലവന്‍ തന്നെയാണ് ബെംഗളൂരുവിനുളളത്.
ദിനേഷ് കാര്‍ത്തിക്ക് മെന്റര്‍ റോളില്‍ ടീമിനൊപ്പമുളളത് അവരുടെ ആത്മവിശ്വാസം കൂട്ടുന്നുണ്ട്. ആര്‍സിബിയുടെ ഇപ്പോഴത്തെ സന്തോഷം ഇരട്ടിപ്പിച്ചുകൊണ്ട് പുതിയൊരു വിവരം കൂടി പുറത്തുവന്നിരിക്കുകയാണ്. അവരുടെ സ്റ്റാര്‍ പേസര്‍ ജോഷ് ഹേസല്‍വുഡ് പഞ്ചാബ് കിങ്‌സിനെതിരായ മത്സരത്തില്‍ ടീമില്‍ ഉണ്ടാവുമെന്ന് താത്കാലിക ക്യാപ്റ്റന്‍ ജിതേഷ് ശര്‍മ്മയാണ് അറിയിച്ചിരിക്കുന്നത്. നേരത്തെ പരിക്ക് മൂലം ചില മത്സരങ്ങള്‍ ഹേസല്‍വുഡിന് നഷ്ടപ്പെട്ടിരുന്നു.
Read more
താരത്തിന്റെ അസാന്നിദ്ധ്യം നിര്‍ണായക മത്സരങ്ങളില്‍ ബെംഗളൂരുവിന് തിരിച്ചടിയായി. ഈ സീസണില്‍ 10 കളികളില്‍ നിന്നായി 18 വിക്കറ്റുകളാണ് ഹേസല്‍വുഡ് വീഴ്ത്തിയത്. 17.28 ആണ് ശരാശരി. എക്കണോമി റേറ്റ് 8.44ഉം. ഹേസല്‍വുഡിന് പുറമെ ആര്‍സിബിക്ക് വേണ്ടി അടുത്ത മത്സരങ്ങളില്‍ ടിം ഡേവിഡും ഇറങ്ങിയേക്കും. താരത്തിനും പരിക്ക് ഭേദമായെന്നാണ് റിപ്പോര്‍ട്ടുകള്‍. ഹേസല്‍വുഡിന്റെയും ടിം ഡേവിഡിന്റെയും തിരിച്ചുവരവ് ആര്‍സിബി ടീമിന്റെ കരുത്ത് കൂട്ടും.
