ഇതിഹാസ ഓസ്‌ട്രേലിയൻ ക്രിക്കറ്റ് താരം ആദം ഗിൽക്രിസ്റ്റ് തന്റെ എക്കാലത്തെയും മികച്ച ഇന്ത്യൻ പ്രീമിയർ ലീഗ് (ഐപിഎൽ) ഇലവനെ തിരഞ്ഞെടുത്തിരിക്കുകയാണ്. കരിയറിൽ ഐപിഎൽ ട്രോഫി ഉയർത്തിയ കളിക്കാർക്ക് മാത്രമേ അദ്ദേഹം ടീമിൽ ഇടം നൽകിയുള്ളു എന്നതാണ് ശ്രദ്ധിക്കേണ്ട കാര്യം.
ഗിൽക്രിസ്റ്റിന്റെ ‘വിജയികൾക്ക് മാത്രമുള്ള’ സ്വപ്ന ടീമിൽ ലീഗിലെ ഏറ്റവും പ്രബലമായ രണ്ട് ഫ്രാഞ്ചൈസികളായ മുംബൈ ഇന്ത്യൻസ് (എംഐ), ചെന്നൈ സൂപ്പർ കിംഗ്സ് (സിഎസ്കെ) എന്നിവയിലെ താരങ്ങളുടെ പേരാണ് കൂടുതലായി കാണാൻ സാധിക്കുന്നത്. ഗിൽക്രിസ്റ്റ്, സി‌എസ്‌കെയുടെ ഇതിഹാസ താരം എംഎസ് ധോണിയെയാണ് ഈ ടീമിന്റെ ക്യാപ്റ്റനായി തിരഞ്ഞെടുത്തത്. ധോണിക്കൊപ്പം വിശ്വസ്തരായ സിഎസ്കെ സഹതാരങ്ങളായ സുരേഷ് റെയ്‌നയും രവീന്ദ്ര ജഡേജയും ഉൾപ്പെടുന്നു. മുംബൈയിൽ നിന്ന് മുൻ നായകൻ രോഹിത് ശർമ്മ, സൂര്യകുമാർ യാദവ്, വെസ്റ്റ് ഇൻഡീസ് ഓൾറൗണ്ടർ കീറോൺ പൊള്ളാർഡ്, പേസ് ജോഡികളായ ലസിത് മലിംഗ, ജസ്പ്രീത് ബുംറ എന്നിവരെ അദ്ദേഹം തിരഞ്ഞെടുത്തു.
ഇലവനിലെ ഏക ഓസ്‌ട്രേലിയൻ താരം ഡേവിഡ് വാർണർ മാത്രമാണ്. സ്ഥിരതയ്ക്കും ആക്രമണാത്മക ശൈലിക്കും പേരുകേട്ട വാർണർ ഇപ്പോഴും ടൂർണമെന്റിലെ എക്കാലത്തെയും മികച്ച റൺസ് സ്‌കോറർമാരിൽ ഒരാളാണ്. കെ‌കെ‌ആറിൽ നിന്ന്, ഗെയിം മാറ്റുന്ന സ്പെല്ലുകൾക്കും പിഞ്ച്-ഹിറ്റിംഗ് കഴിവിനും പേരുകേട്ട നിഗൂഢ സ്പിന്നർ സുനിൽ നരെയ്‌നെ ഗിൽക്രിസ്റ്റ് തിരഞ്ഞെടുത്തു. മറ്റൊരു പേസറായി വന്നിരിക്കുന്നത് ഭുവനേശ്വർ കുമാർ ആണ്.
എന്തായാലും ലീഗ് ചരിത്രത്തിലെ ഏറ്റവും മികച്ച താരമായിട്ടും കിരീടം നേടാൻ സാധിക്കാത്തതിനാൽ തന്നെ വിരാട് കോഹ്‌ലിക്ക് ടീമിൽ ഇടം കിട്ടിയില്ല.
ടീം ഇങ്ങനെ: എംഎസ് ധോണി (സി), രോഹിത് ശർമ, ഡേവിഡ് വാർണർ, സുരേഷ് റെയ്ന, സൂര്യകുമാർ യാദവ്, കീറോൺ പൊള്ളാർഡ്, സുനിൽ നരെയ്ൻ, രവീന്ദ്ര ജഡേജ, ജസ്പ്രീത് ബുംറ, ലസിത് മലിംഗ, ഭുവനേശ്വർ കുമാർ
Read more
