ഓസീസിനെതികായി ഗബ്ബയില് നടന്നു കൊണ്ടിരിക്കുന്ന നാലാം ടെസ്റ്റിലും തുടര്ക്കഥയായി കാണികളുടെ അധിക്ഷേപം. നാലാം ടെസ്റ്റിനിടെ ഇന്ത്യന് താരങ്ങളായ മുഹമ്മദ് സിറാജിനും വാഷിങ്ടണ് സുന്ദറിനുമെതിരേയാണ് കാണികളുടെ അധിക്ഷേപം. മൂന്നാം ടെസ്റ്റിനിടെ സിറാജിനെതിരെയുണ്ടായ വംശീയ അധിക്ഷേപത്തില് അന്വേഷണം നടക്കവേയാണ് നാലാം ടെസ്റ്റിലും സംഭവം ആവര്ത്തിക്കപ്പെട്ടത്. ഇതിനെതിരെ ഇന്ത്യ പരാതി സമര്പ്പിച്ചിട്ടുണ്ട്.
“ഞങ്ങള് പരാതി സമര്പ്പിച്ചിട്ടുണ്ട്. അതേക്കുറിച്ച് അധികാരികള് അന്വേഷിക്കണം. മാച്ച് റഫറിയോടും അമ്പയറോടും ഇക്കാര്യം ഞങ്ങള് അറിയിച്ചിട്ടുണ്ട്. ഗ്രൗണ്ടില് ഇന്ത്യന് താരങ്ങള്ക്കെതിരേ നടന്ന കാര്യങ്ങള് ഒരിക്കലും അംഗീകരിക്കാനാവാത്തതാണ്. മറ്റൊരു സ്ഥലത്തും ഇങ്ങനെ നടക്കുമെന്ന് ഞങ്ങള് കരുതുന്നില്ല. ഞങ്ങള് കാണികളുടെ സമീപനത്തില് ശരിക്കും അസ്വസ്ഥരാണ്” ഇന്ത്യന് നായകന് അജിങ്ക്യ രഹാനെ പറഞ്ഞു.
ടെസ്റ്റിനിടെ കാണികളില് ഒരു വിഭാഗം അധിക്ഷേപിക്കുന്ന ദൃശ്യങ്ങള് സോഷ്യല് മീഡിയയിലൂടെ പ്രചരിക്കുന്നുണ്ട്. പുഴുവെന്നും മറ്റും ഇവര് സിറാജിനെ കളിയാക്കുന്നത് ഈ വീഡിയോയില് കേള്ക്കാം. സിറാജിനെ മാത്രമല്ല ഗാബ ടെസ്റ്റില് അരങ്ങേറിയ വാഷിങ്ടണ് സുന്ദറിനും കാണികളില് നിന്നും അധിക്ഷേപം നേരിടേണ്ടി വന്നതായി സിഡ്നി മോണിംഗ് ഹെറാള്ഡ് റിപ്പോര്ട്ട് ചെയ്യുന്നു.
Read more
കെയ്റ്റെന്ന ഒരു കാണിയെ ഉദ്ധരിച്ചാണ് റിപ്പോര്ട്ട്. തനിക്കു പിറകിലിരുന്നവരാണ് സിറാജിനെയും സുന്ദറിനെയും മോശം പേരുകള് വിളിച്ച് അധിക്ഷേപിച്ചെന്നാണ് ഇവരുടെ വെളിപ്പെടുത്തല്. സിറാജിനേക്കാള് ഏറെ സുന്ദറിനെയാണ് കാണികള് അപമാനിച്ചത്.