ഇന്ത്യയും ശ്രീലങ്കയും തമ്മിലുള്ള ഏകദിന പരമ്പര ഈയാഴ്ച ആരംഭിക്കാനിരിക്കെ ഇന്ത്യയുടെ ഓപ്പണിംഗ് കോമ്പിനേഷനെ കുറിച്ചുള്ള നിര്‍ണായക വിവരം പുറത്ത്. നായകന്‍ ശിഖര്‍ ധവാനൊപ്പം ഓപ്പണിംഗില്‍ പങ്കാളിയാവാന്‍ പൃഥ്വി ഷാ, പുതുമുഖങ്ങളായ ദേവ്ദത്ത് പടിക്കല്‍, ഋതുരാജ് ഗെയ്ക്ക്വാദ് എന്നിവരാണ് മത്സരിച്ചിരുന്നത്. എന്നാല്‍ അന്തിമ വിജയം ഷായ്ക്കാണെന്നാണ് പുറത്തു വരുന്ന വിവരം.
ധവാനോടൊപ്പം പൃഥ്വി ഷാ തന്നെയാരിക്കും ഓപ്പണറായി കളിക്കുകയെന്ന് കൊളംബോയില്‍ നിന്നും ടീം വൃത്തങ്ങള്‍ വെളിപ്പെടുത്തി. ദേവ്ദത്തിനും റുതുരാജിനും അവസരത്തിനായി കാത്തിരിക്കേണ്ടി വരുമെന്നും ബന്ധപ്പെട്ട വൃത്തങ്ങള്‍ സൂചിപ്പിച്ചു. അടുത്ത കാലത്തായി മികച്ച ഫോമിലാണ് എന്നതാണ് പരിചയ സമ്പന്നതയ്‌ക്കൊപ്പം ഷായ്ക്ക് മുതല്‍ക്കൂട്ടായത്.
വിജയ് ഹസാരെ ട്രോഫിയില്‍ മുംബൈയ്ക്കായി 165.40 ശരാശരിയില്‍ 827 റണ്‍സ് വാരിക്കൂട്ടി ഷാ റെക്കോര്‍ഡിട്ടിരുന്നു. ഐ.പി.എല്ലില്‍ ഡല്‍ഹി ക്യാപ്പിറ്റല്‍സിനൊപ്പവും മികച്ച പ്രകടനമാണ് താരം കാഴ്ചവെച്ചത്. ഏകദിനത്തില്‍ തഴഞ്ഞാലും മലയാളി താരം ദേവ്ദത്തിനെ ടി20 പരിഗണിക്കുമെന്നാണ് കരുതേണ്ടത്.
Read more
മൂന്നു വീതം ഏകദിന-ടി20 മത്സരങ്ങളാണ് ഇന്ത്യ ലങ്കയില്‍ കളിക്കുന്നത്. ഏകദിന പരമ്പരോടെയാണ് പരമ്പര ആരംഭിക്കുക. ഏകദിനങ്ങള്‍ 18, 20, 23 തിയതികളിലായിരിക്കും നടക്കുക. ടി20 മല്‍സരങ്ങള്‍ 25, 27, 29 തിയതികളിലായും നടക്കും. 13 ന് ആരംഭിക്കേണ്ട പമ്പര ലങ്കന്‍ ടീമില്‍ കോവിഡ് സ്ഥിരീകരിച്ചതിന് പിന്നാലെ നീട്ടിവെയ്ക്കുകയായിരുന്നു.
