ഇന്ത്യന്‍ ടെസ്റ്റ് ടീമിന്റെ നായകനാവുന്നതിനെക്കുറിച്ചുള്ള തന്റെ ആഗ്രഹം തുറന്ന് പറഞ്ഞ് സൂപ്പര്‍ പേസര്‍ ജസ്പ്രീത് ബുംറ. അവസരം ലഭിച്ചാല്‍ നായകസ്ഥാനം ഏറ്റെടുക്കുന്നതില്‍ ബുദ്ധുമുട്ടില്ലെന്നും എന്നാല്‍ ഒരു സ്ഥാനത്തിന്റെയും പിന്നാലെ പോകാന്‍ ആഗ്രഹിക്കുന്നില്ലെന്നും ബുംറ പറഞ്ഞു.
‘എന്നെ സംബന്ധിച്ച് ഏത് ഉത്തരവാദിത്തതിലും ടീമിനൊപ്പം പ്രവര്‍ത്തിക്കാന്‍ തയ്യാറാണ്. ടീമിനുവേണ്ടി ഏതൊക്കെ രീതിയില്‍ ചെയ്യാന്‍ സാധിക്കുമോ അതൊക്കെ ചെയ്യാന്‍ സന്തോഷം മാത്രമാണുള്ളത്. നായകനായി അവസരം ലഭിച്ചാല്‍ തീര്‍ച്ചയായും അത് സ്വീകരിക്കും. എന്നാല്‍ ഞാന്‍ പിന്തുടരാന്‍ ആഗ്രഹിക്കുന്ന കാര്യങ്ങളിലൊന്നല്ല അത്.’
‘എന്റെ ജോലി ചെയ്യാനാണ് ഞാന്‍ ആഗ്രഹിക്കുന്നത്. ഏതെങ്കിലും സ്ഥാനം ഉണ്ടോ ഇല്ലെയോ എന്നത് പ്രശ്നമല്ല. എനിക്ക് ചെയ്യാനുള്ളത് ഞാന്‍ ചെയ്യും. അതുകൊണ്ട് തന്നെ നായകസ്ഥാനം വലിയ കാര്യമായി കരുതുന്നില്ല. അവസരം ലഭിച്ചാല്‍ അതൊരു വലിയ അംഗീകാരം ആയിരിക്കും. അതിനെക്കാളും മികച്ചൊരു അനുഭവം ഉണ്ടെന്ന് കരുതുന്നില്ല’ ബുംറ പറഞ്ഞു.
Read more
വിരാട് കോഹ്‌ലി ടെസ്റ്റ് ക്രിക്കറ്റ് ടീമിന്റെ നായകസ്ഥാനം ഒഴിഞ്ഞതോടെ പുതിയ നായകനെ കണ്ടെത്താനുള്ള തിരക്കിലാണ് ഇന്ത്യ. നിലവിലെ സാധ്യത പ്രകാരം വൈസ് ക്യാപ്റ്റനായ രോഹിത് ശര്‍മ ഇന്ത്യയുടെ നായകനായി എത്തിയേക്കും. ഋഷഭ് പന്ത്, കെ എല്‍ രാഹുല്‍ എന്നിവരും പരിഗണനയിലുണ്ട്. എന്നാല്‍ ബുംറയെ ആ സ്ഥാനത്തേക്ക് പരിഗണിക്കുന്നതിനുള്ള സാദ്ധ്യത വിരളമാണ്.
