അഫ്ഗാന്‍ ലോക കപ്പ് നേടിയശേഷം മാത്രം വിവാഹം; താന്‍ അങ്ങനെ പറഞ്ഞിട്ടില്ലെന്ന് റാഷിദ് ഖാന്‍

അഫ്ഗാനിസ്ഥാന്‍ ലോക കപ്പ് നേടിയശേഷം മാത്രമേ വിവാഹം കഴിക്കുകയുള്ളു എന്ന് താന്‍ ഒരിടത്തും പറഞ്ഞിട്ടില്ലെന്ന് റാഷിദ് ഖാന്‍. ലോക കപ്പില്‍ മികവ് കാണിക്കുകയാണ് ഇപ്പോള്‍ തനിക്ക് മുന്‍പിലുള്ള ലക്ഷ്യമെന്നും വിവാഹത്തിലല്ലെന്നും റാഷിദ് പറഞ്ഞു.

‘അഫ്ഗാനിസ്ഥാന്‍ ലോക കപ്പ് ജയിച്ചാല്‍ മാത്രമാവും വിവാഹം എന്ന് ഞാന്‍ എവിടേയും പറഞ്ഞിട്ടില്ല. ഇത് കേട്ടപ്പോള്‍ ഞാന്‍ ശരിക്കും ഞെട്ടി. അടുത്ത വര്‍ഷങ്ങളില്‍ എനിക്ക് ഒരുപാട് ക്രിക്കറ്റ് മത്സരങ്ങള്‍ ഉണ്ടെന്നും മൂന്ന് ലോകകപ്പുകള്‍ വരുന്നുണ്ട്. അതിലേക്ക് മാത്രമാണ് ശ്രദ്ധ എന്നാണ് ഞാന്‍ പറഞ്ഞത്’ റാഷിദ് പറഞ്ഞു.

Rashid Khan steps down as Afghanistan skipper for T20 World Cup

യുഎഇയിലെ പിച്ച് സ്പിന്നര്‍മാര്‍ക്ക് ഏറെ ഗുണകരമാണെന്നും ടൂര്‍ണമെന്റില്‍ നന്നായി ബാറ്റ് ചെയ്യാനായാല്‍ അഫ്ഗാന്‍ ടീമിന് ഏത് ടീമിനെയും തോല്‍പ്പിക്കാനാകുമെന്നും റാഷിദ് ഖാന്‍ പറഞ്ഞു. ‘സ്പിന്നര്‍മാര്‍ക്ക് ഇവിടത്തെ സാഹചര്യങ്ങള്‍ എപ്പോഴും നല്ലതാണ്. ഇത് സ്പിന്നര്‍മാരുടെ ലോക കപ്പായിരിക്കും. ഇവിടെ എങ്ങനെ വിക്കറ്റുകള്‍ തയ്യാറാക്കിയാലും പ്രശ്‌നമില്ല. അത് സ്പിന്നര്‍മാര്‍ക്ക് എപ്പോഴും സഹായകരമായിരിക്കും. ഈ ലോകകപ്പില്‍ സ്പിന്നര്‍മാര്‍ വലിയ പങ്ക് വഹിക്കും.’

Afghanistan can beat any side if we bat well in T20 World Cup: Rashid Khan (Twitter Photo)

‘സ്പിന്നര്‍മാര്‍ അവരുടെ ടീമിനെ കളിയില്‍ തിരിച്ചുകൊണ്ടുവന്നത് ഐപിഎല്ലില്‍ നമ്മള്‍ കണ്ടതാണ്. ലോക കപ്പിലും ഇതുതന്നെ സംഭവിക്കുമെന്ന് എനിക്ക് തോന്നുന്നു. മികച്ച സ്പിന്നര്‍മാര്‍ അവരുടെ ടീമിനെ കളിയില്‍ തിരികെ കൊണ്ടുവന്ന് വിജയിപ്പിക്കും. ടൂര്‍ണമെന്റില്‍ മികച്ച ബാറ്റിംഗ് പുറത്തെടുക്കാനായാല്‍ ഞങ്ങള്‍ക്ക് ഏത് ടീമിനെയും തോല്‍പ്പിക്കാനാകും’ റാഷിദ് പറഞ്ഞു.