കോവിഡ് ബാധ മൂലം നിര്‍ത്തിവെച്ച ഐപിഎല്ലിന്റെ രണ്ടാം ഘട്ടത്തിന് വേദിയൊരുക്കാന്‍ തയ്യാറെടുക്കുകയാണ് യുഎഇ. സെപ്റ്റംബര്‍ മധ്യത്തിലാണ് ഐപിഎല്ലിന്റെ അവശേഷിക്കുന്ന മത്സരങ്ങള്‍ തുടങ്ങുക. ടൂര്‍ണമെന്റിന്റെ മുന്നൊരുക്കത്തിലുള്ള പഞ്ചാബ് കിംഗ്സിന് ആശ്വാസം പകര്‍ന്ന് ഇംഗ്ലീഷ് ബാറ്റ്‌സ്മാന്‍ ഡേവിഡ് മലാന്റെ വാക്കുകള്‍. ഐപിഎല്‍ കളിക്കാന്‍ താന്‍ എത്തുമെന്ന് മലാന്‍ ഉറപ്പ് നല്‍കുന്നു.
ഐപിഎല്ലിന്റെ കാര്യത്തില്‍ മാത്രമേ ഇപ്പോള്‍ ഉറപ്പു നല്‍കാന്‍ സാധിക്കുകയുള്ളൂ. ട്വന്റി20 ലോക കപ്പിനോ ആഷസിനോ പോകുമോയെന്ന് അറിയില്ല. അതിനെ ചുറ്റിപ്പറ്റിയുള്ള അനിശ്ചിതത്വം ഇംഗ്ലണ്ടിനെ പ്രതിസന്ധിയിലേക്ക് തള്ളിയിടുന്നു- മലാന്‍ പറഞ്ഞു.ലോക കപ്പിന്റെയും ആഷസിന്റെയും കാര്യത്തില്‍ എല്ലാ സാദ്ധ്യതകളും പരിശോധിക്കുന്നുണ്ട്. എന്നാല്‍ ഈ നിമിഷത്തില്‍ ഐപിഎല്ലിനോടാണ് പ്രതിബദ്ധത. പക്ഷേ, സാഹചര്യങ്ങള്‍ക്ക് അനുസരിച്ച് പുനര്‍വിചിന്തനമുണ്ടാകുമെന്നും മലാന്‍ കൂട്ടിച്ചേര്‍ത്തു.
Read more
ഐസിസിയുടെ ട്വന്റി20 ബാറ്റ്‌സ്മാന്‍മാരുടെ പട്ടികയില്‍ ഒന്നാം സ്ഥാനത്തുള്ള മലാന്‍ ഇന്ത്യക്കെതിരായ ടെസ്റ്റ് പരമ്പരയിലും കളിക്കുന്നുണ്ട്. മികച്ച ഫോമിലുള്ള മലാന്‍ ഐപിഎല്ലിന് എത്തിയാല്‍ പഞ്ചാബ് കിംഗ്സിന് അതു ഊര്‍ജ്ജം പകരുമെന്ന് വിലയിരുത്തപ്പെടുന്നു.
