ലോക കപ്പിന് മുന്നോടിയായി നടക്കുന്ന ഇന്ത്യന്‍ പ്രീമിയര്‍ ലീഗിന്റെ ആവേശത്തിലാണ് ക്രിക്കറ്റ് പ്രേമികള്‍. മാര്‍ച്ച് 23 ന് ആരംഭിക്കുന്ന ടൂര്‍ണമെന്റില്‍ ഇന്ത്യന്‍ ടീമിന്റെ കുപ്പായത്തില്‍ കളിക്കുന്ന പല താരങ്ങളും നേര്‍ക്കുനേര്‍ പോരിനിറങ്ങും. ആദ്യ മത്സരത്തില്‍ ചെന്നൈ സൂപ്പര്‍ കിങ്‌സും റോയല്‍ ചലഞ്ചേഴ്‌സ് ബംഗളൂരുവും തമ്മിലാണ് ഏറ്റുമുട്ടുന്നത്.
ഇന്ത്യന്‍ ക്രിക്കറ്റിലെ രണ്ട് ഹെവിവെയ്റ്റുകള്‍ തമ്മില്‍ നേര്‍ക്കുനേര്‍ വരുന്ന പോരാട്ടം എന്ന പ്രത്യേകതയും ഉദ്ഘാടന മത്സരത്തിനുണ്ട്. മഹേന്ദ്ര സിങ് ധോണി ചെന്നൈ സൂപ്പര്‍ കിംഗ്സ് ക്യാപ്റ്റനായും വിരാട് കോഹ്ലി റോയല്‍ ചലഞ്ചേഴ്‌സ് ബംഗളൂരുവിന്റെ ക്യാപ്റ്റനായുമാണ് ഐപിഎല്ലിനെത്തുന്നത്. ഈ രണ്ട് താരങ്ങളും നേര്‍ക്കുനേര്‍ വരുന്നു എന്നതു കൊണ്ട് തന്നെ ടൂര്‍ണമെന്റിന്റെ ടീസറില്‍ ഇവര്‍ പരസ്പരം വെല്ലുവിളിക്കുന്ന തീമാണ് ഒരുക്കിയിരിക്കുന്നത്.
ഈ പരസ്യമാണ് ഇപ്പോള്‍ ക്രിക്കറ്റ് പ്രേമികള്‍ക്കിടയില്‍ വൈറലായിരിക്കുന്നത്. ഒരിക്കലും വൈകരുതെന്ന് ധോണി പറയുന്നതാണ് പരസ്യത്തില്‍ ഹൈലൈറ്റ് ചെയ്തിരിക്കുന്നത്. 2013ലെ ഒത്തുകളി വിവാദത്തെ തുടര്‍ന്ന് രണ്ട് വര്‍ഷത്തെ വിലക്കിന് ശേഷം 2018ല്‍ ആണ് ചെന്നൈ സൂപ്പര്‍ കിംഗ്സ് ഐപിഎല്ലിന് എത്തിയത്. കിരീടം ചൂടിയായിരുന്നു ധോണിയും കൂട്ടരും തിരിച്ചുവരവ് ആഘോഷിച്ചത്.
Read more
അതേസമയം, ഒറ്റ ട്രോഫി പോലും സ്വന്തമാക്കാന്‍ സാധിക്കാത്ത റോയല്‍ ചലഞ്ചേഴ്‌സ് എല്ലാ വര്‍ഷവും ആരാധകരെ നിരാശരാക്കിയിരുന്നു. ഈ വര്‍ഷമെങ്കിലും കാത്തിരിപ്പ് സഫലമാകുമെന്ന പ്രതീക്ഷയിലാണ് ബംഗളൂരു ആരാധകര്‍.
