ഇന്ത്യയിലെ ബാങ്കുകളില്‍ നിന്ന് കോടികള്‍ വായ്പയെടുത്ത് കടക്കെണിയിലായി രാജ്യം വിട്ട മദ്യ വ്യവസായി വിജയ് മല്യയ്ക്ക് ക്രിക്കറ്റ് മത്സരം കാണാനെത്തിയപ്പോള്‍ കൂക്കുവിളി. ലണ്ടനിലെ ഓവലില്‍ നടന്ന ഇന്ത്യ-ഓസ്ട്രേലിയ മത്സരം കണ്ട് മടങ്ങവേയാണ് മല്യയെ തിരിച്ചറിഞ്ഞ് ഇന്ത്യക്കാരായ കാണികള്‍ “കള്ളന്‍… കള്ളന്‍…” എന്ന് കൂവി വിളിച്ചത്.
സ്റ്റേഡിയത്തിലേക്ക് മത്സരം കാണാനെത്തിയ വിജയ് മല്യയെ ഇന്ത്യയില്‍ നിന്നുള്ള മാധ്യമപ്രവര്‍ത്തകര്‍ വളഞ്ഞിരുന്നു. എന്നാല്‍ ചോദ്യങ്ങളോട് പ്രതികരിക്കാതെ കളി കാണാനാണ് താന്‍ ഇവിടെ എത്തിയതെന്നായിരുന്നു മല്യ പറഞ്ഞത്. തുടര്‍ന്ന് കളി കഴിഞ്ഞ് മടങ്ങിയപ്പോഴാണ് ഇന്ത്യക്കാരായ കാണികള്‍ “വിജയ് മല്യ ചോര്‍ ഹെ” എന്ന മുദ്രാവാക്യം ഉയര്‍ത്തിയത്. രാജ്യത്തോട് മാപ്പു പറയണമെന്നും ചിലര്‍ ഉച്ചത്തില്‍ വിളിച്ചു പറഞ്ഞു.
#WATCH London, England: Vijay Mallya says, "I am making sure my mother doesn't get hurt", as crowd shouts "Chor hai" while he leaves from the Oval after the match between India and Australia. pic.twitter.com/ft1nTm5m0i
— ANI (@ANI) June 9, 2019
Read more
ഇത് വകവെയ്ക്കാതെ വാഹനത്തിലേക്ക് നീങ്ങിയ മല്യ “തന്റെ അമ്മയ്ക്ക് ഇത് വിഷമമുണ്ടാക്കില്ലെന്ന് ഉറപ്പു വരുത്തേണ്ടതുണ്ട്” എന്നാണ് മാധ്യമങ്ങളോട് പ്രതികരിച്ചത്. 2016 മാര്‍ച്ചിലാണ് വിജയ് മല്യ ഇന്ത്യയില്‍ നിന്ന് ബ്രിട്ടനിലേക്ക് കടന്നത്. അടുത്തിടെ വിജയ് മല്യയെ ഇന്ത്യയ്ക്ക് കൈമാറാന്‍ ലണ്ടനിലെ കോടതി ഉത്തരവിട്ടിരുന്നു. ഇതിനെതിരായ അപ്പീലും കോടതി തള്ളിയിരുന്നു. 9000 കോടി രൂപയാണ് മല്യ ഇന്ത്യയിലെ വിവിധ ബാങ്കുകളില്‍ നിന്നായി വായ്പയെടുത്തിട്ടുള്ളത്.
