പണമുള്ളവർക്ക് മാത്രം സർക്കാർ ജോലി, സ്ഥിതി മാറ്റണം; പ്രധാനമന്ത്രിക്ക് രക്തം കൊണ്ട് കത്തെഴുതി യുവാവ്

സർക്കാർ ജോലിക്കായുള്ള പരീക്ഷകൾ കൂടുതൽ സുതാര്യവും സത്യസന്ധവുമാക്കണമെന്നാവശ്യപ്പെട്ട് പ്രധാനമന്ത്രി നരേന്ദ്രമോദിക്ക് രക്തംകൊണ്ട് കത്തെഴുതി യുവാവ്. കർണാടകയിലെ ബെലഗാവി ജില്ലയിലെ അദഹലട്ടി സ്വദേശിയായ ശൈല മിത്തതരഗിയാണ് പ്രധാനമന്ത്രിക്ക് സ്വന്തം രക്തംകൊണ്ട് കത്തെഴുതിരിക്കുന്നത്.

സംസ്ഥാനത്തെ എസ്.ഐ. നിയമന പരീക്ഷത്തട്ടിപ്പുമായി ബന്ധപ്പെട്ട് പുറത്തുവരുന്ന വാർത്തകൾക്ക് പിന്നാലെയാണ് യുവാവിന്റെ കത്ത്.
നിയമന പരീക്ഷത്തട്ടിപ്പുകൾ അത്യന്തം ഖേദകരമാണെന്നും സിവിൽ സർവീസ് പരീക്ഷയ്ക്ക് തയ്യാറെടുക്കുന്ന തന്നെ ഇത്തരം ക്രമക്കേടുകൾ നിരുത്സാഹപ്പെടുത്തുന്നെന്നുമാണ് യുവാവ് കത്തിൽ പറയുന്നത്.

കഴിഞ്ഞവർഷത്തെ സിവിൽ സർവീസ് പരീക്ഷയിൽ ഇതിൽ വിജയിക്കാൻ കഴിയാഞ്ഞതോടെ വീണ്ടും പരീക്ഷയ്ക്ക് തയ്യാറെടുക്കുകയായിരുന്നു. ഇതിനിടെയാണ് എസ്.ഐ. നിയമനപരീക്ഷ സംബന്ധിച്ച ക്രമക്കേടുകൾ പുറത്തുവന്നത്. ഇതോടെ പഠിക്കാനുള്ള താത്പര്യം നഷ്ടപ്പെട്ടെന്നും പണമുള്ളവർക്കുമാത്രം സർക്കാർജോലി ലഭിക്കുന്ന സാഹചര്യമാണുള്ളതെന്നും യുവാവ് കത്തിൽ ആരോപിക്കുന്നു.

പ്രധാനമന്ത്രി ഇത്തരം പ്രശ്‌നങ്ങളിൽ നേരിട്ട് ഇടപെട്ട് നടപടി സ്വീകരിക്കണമെന്ന് ആവശ്യപ്പെട്ടാണ് കത്ത് അവസാനിപ്പിച്ചിരിക്കുന്നത്. സമൂഹ്യ മാധ്യമങ്ങൾ വഴി വെെറലായ കത്ത് ശൈല മിത്തതരഗി തന്നെയാണ് പോസ്റ്റ് ചെയ്തിരിക്കുന്നത്. കത്തിനെ അനുകൂലിച്ചും വിമർശിച്ചും ഒട്ടേറെപ്പേരാണ് രംഗത്തെത്തിയത്. എസ്.ഐ. നിയമന പരീക്ഷത്തട്ടിപ്പിൽ ഡിവൈ.എസ്.പി. റാങ്കിലുള്ള ഉദ്യോഗസ്ഥരടക്കം 51 പേരെ ഇതിനോടകം സി.ഐ.ഡി. സംഘം അറസ്റ്റുചെയ്തിട്ടുണ്ട്.