ഗാസയില്‍ ഇസ്രയേല്‍ നടത്തുന്ന വംശഹത്യ അവസാനിപ്പിക്കണമെന്ന് സിപിഎം പൊളിറ്റ് ബ്യൂറോ. ഗാസയിലെ വംശഹത്യ അവസാനിപ്പിക്കാന്‍ ഇസ്രായേലിന് മേല്‍ സമ്മര്‍ദ്ദം ചെലുത്താന്‍ ബിജെപി നേതൃത്വത്തിലുള്ള കേന്ദ്ര സര്‍ക്കാര്‍ തയ്യാറാകണം. യുദ്ധക്കുറ്റങ്ങള്‍ക്കും വംശഹത്യയ്ക്കും എതിരെ നിലകൊള്ളണം. ഇസ്രയേല്‍ ഗാസയില്‍ നടത്തുന്ന തുടര്‍ച്ചയായ ആക്രമണത്തില്‍ അഗാധമായ ദുഃഖം പ്രകടിപ്പിക്കുന്നു. ഇസ്രയേലി ആക്രമണങ്ങള്‍ ഉടനടി അവസാനിപ്പിക്കുകയും വെടിനിര്‍ത്തല്‍ നടപ്പിലാക്കുകയും വേണം. 2025 ഏപ്രിലില്‍ മാത്രം ഗാസയില്‍ ഇസ്രയേല്‍ നടത്തിയ വ്യോമ, കര ആക്രമണങ്ങളില്‍ 2,037 പലസ്തീനികള്‍ കൊല്ലപ്പെട്ടു.
കഴിഞ്ഞ രണ്ട് ദിവസത്തിനുള്ളില്‍ മാത്രം 200ലധികം പലസ്തീനികളാണ് കൊല്ലപ്പെട്ടത്. 2023 ഒക്ടോബര്‍ 7 മുതല്‍ ആകെ 53,384 പലസ്തീന്‍കാരാണ് ഗാസയില്‍ ഇസ്രയേല്‍ വംശഹത്യയില്‍ കൊല്ലപ്പെട്ടത്. അതില്‍ 94 ശതമാനവും സാധാരണക്കാരാണ്. 51 ശതമാനം കുട്ടികളും 16 ശതമാനം സ്ത്രീകളും 8 ശതമാനം വയോധികരും കൊല്ലപ്പെട്ടവരില്‍ ഉള്‍പ്പെടുന്നു.
മാനുഷിക സഹായമെത്തിക്കുന്ന ട്രക്കുകളുടെ പ്രവേശനം രണ്ട് മാസത്തിലേറെയായി നിഷേധിച്ചതിന് ശേഷം നാമമാത്രമായ സഹായങ്ങള്‍ മാത്രം ഗാസയിലേക്ക് പ്രവേശിക്കാനാണ് ഇസ്രയേല്‍ ഇപ്പോള്‍ അനുവദിച്ചത്. കടുത്ത പട്ടിണിയിലാണ് ഗാസയെന്നാണ് റിപ്പോര്‍ട്ട്. അമേരിക്കയുടെ പിന്തുണയോടെ ഗാസ മുനമ്പ് പൂര്‍ണമായി അധീനതയിലാക്കുന്നതിനെപ്പറ്റിയാണ് ഇസ്രയേല്‍ സംസാരിക്കുന്നത്.
Read more
പലസ്തീന്‍ ജനതയോടുള്ള ഐക്യദാര്‍ഢ്യം ആവര്‍ത്തിക്കുന്നതായും 1967 ന് മുമ്പുള്ള അതിര്‍ത്തികളും കിഴക്കന്‍ ജറുസലേം തലസ്ഥാനവുമായുള്ള ഒരു പലസ്തീന്‍ രാഷ്ട്രം എന്ന ന്യായമായ ആവശ്യത്തിനൊപ്പം നില്‍ക്കുന്നതായും സിപിഐ എം പ്രസ്താവനയില്‍ പറഞ്ഞു.
