ഡൽഹിയിലെ സംഘർഷത്തെ തുടർന്ന് എഐസിസി ഓഫീസിൽ അടിയന്തര യോഗം ചേരുമെന്ന് കെസി വേണുഗോപാൽ എംപി. ഒരു രാഷ്ട്രീയ പാർട്ടിയെന്ന നിലയിൽ കോൺഗ്രസിനെ പ്രവർത്തിക്കാൻ പോലും അനുവദിക്കാത്ത തരത്തിലാണ് സർക്കാരിന്റെ സമീപനമെന്ന് കെസി വേണുഗോപാൽ പറഞ്ഞു. ഇന്ത്യയുടെ പല ഭാഗങ്ങളിലും സമരം നടക്കുന്നുണ്ട്.
ജനാധിപത്യ വിരുദ്ധ മാർഗങ്ങളിലൂടെയാണ് കോൺഗ്രസിനെ അടിച്ചമർത്തുന്നത്. നേതാക്കളുടെ അറസ്റ്റിലേക്ക് കാര്യങ്ങൾ പോയാൽ ഇതിലും വലിയ പ്രതിഷേധം സർക്കാർ കാണേണ്ടിവരുമെന്നും അദ്ദേഹം വ്യക്തമാക്കി. നാഷണൽ ഹെറാൾഡ് കേസിൽ രാഹുൽ ഗാന്ധിയെ ഇ ഡി ചോദ്യം ചെയ്യുന്നതിൽ ആശങ്കയില്ലന്നും. രാഹുൽ ഗാന്ധി മുൻ‌കൂർ ജാമ്യത്തിന് ശ്രമിക്കുന്നില്ലന്നും അദ്ദേഹം പറഞ്ഞു.
ഇ ഡി ബിജെപിയുടെ തെരഞ്ഞെടുപ്പ് വിഭാഗത്തിൻ്റെ ജോലിയാണ് ചെയ്യുന്നത്. എത്ര ദിവസം ഹാജരാകാൻ ആവശ്യപ്പെട്ടാലും ഹാജരായി മറുപടി നൽകും അദ്ദേഹം കൂട്ടിച്ചേർത്തു. ഈ കേസിൽ കള്ളപ്പണം വെളുപ്പിക്കൽ വരുന്നില്ലന്നും ഒരാള് പോലും പണം കൈപ്പറ്റിയിട്ടില്ലെന്നും അദ്ദേഹം പറഞ്ഞു.
Read more
ഡൽഹിയിൽ കോൺഗ്രസിന്റെ ഇഡി ഓഫീസ് മാർച്ച് പൊലീസ് തടഞ്ഞതിനെതിരെ പ്രതിഷേധം തുടരുകയാണ്. ജെബി മേത്തർ ഉൾപ്പടെയുള്ള നേതാക്കളെ റോഡിലൂടെ വലിച്ചിഴച്ചാണ് പൊലീസ് വാഹനത്തിൽ കയറ്റിയത്. എഐസിസി ആസ്ഥാനത്താണ് മഹിളാ കോൺഗ്രസ് പ്രവർത്തകർ പ്രതിഷേധം നടത്തിയത്. വളരെ സമാധാനപരമായി നടത്തിയ മാർച്ചിൽ പൊലീസാണ് പ്രശ്നങ്ങളുണ്ടാക്കിയതെന്ന് ജെബി മേത്തർ എം.പി പറഞ്ഞിരുന്നു.
