സമീറിന്റെ വധുവാകാന്‍ വാഗാ ബോര്‍ഡര്‍ കടന്ന് ജാവരിയ ഖാനം എത്തി. ഇന്ത്യയിലെത്തി സുഹൃത്തിനെ വിവാഹം ചെയ്യാന്‍ പാക് യുവതിയ്ക്ക് 45 ദിവസത്തെ വിസ ലഭിച്ചു. കൊല്‍ക്കത്ത സ്വദേശി സമീര്‍ ഖാന്‍ ആണ് വരന്‍. പാക് പഞ്ചാബില്‍ നിന്നുള്ള ജാവരിയ ഖാനം ആണ് പ്രണയ സാഫല്യത്തിനായി വാഗാ ബോര്‍ഡര്‍ കടന്ന് ഇന്ത്യയിലെത്തിയത്.
വാദ്യ മേളങ്ങളുടെ അകമ്പടിയോടെ ജാവരിയ ഖാനത്തെ സ്വീകരിക്കുന്ന സമീര്‍ ഖാന്റെ വീഡിയോ ഇതോടകം സാമൂഹ്യ മാധ്യമങ്ങളില്‍ വൈറലായി കഴിഞ്ഞു. ജാവരിയ പിതാവ് അസ്മത്ത് ഖാനൊപ്പമാണ് ഇന്ത്യയിലേക്ക് എത്തിയത്. ജാവരിയയും സമീറും കഴിഞ്ഞ അഞ്ച് വര്‍ഷമായി പ്രണയത്തിലാണ്. ഏറെ തടസങ്ങള്‍ക്കൊടുവിലാണ് ഇരുവരുടെയും പ്രണയ സാഫല്യം.
Read more
വിസ ലഭിക്കാന്‍ ആദ്യ ഘട്ടത്തില്‍ തടസങ്ങളുണ്ടായിരുന്നു. തുടര്‍ന്നാണ് 45 ദിവസത്തേക്ക് യുവതിയ്ക്ക് വിസ ലഭിച്ചിരിക്കുന്നത്. വിവാഹ ശേഷം വിസ നീട്ടിക്കിട്ടാന്‍ അപേക്ഷ നല്‍കാനാണ് പാക് യുവതിയുടെ തീരുമാനം. 2024ന്റെ തുടക്കത്തില്‍ കൊല്‍ക്കത്തയിലായിരിക്കും വിവാഹം നടക്കുക. പശ്ചിമ ബംഗാള്‍ സ്വദേശിയായ സമീര്‍ നിലവില്‍ ഗുര്‍ദാസ്പൂരിലാണ് താമസിക്കുന്നത്.
