വിവാഹാഘോഷത്തിനിടെ വരൻ വെടിയുതിർത്തു; സുഹൃത്തിന് ദാരുണാന്ത്യം

By
ന്യൂസ് ഡെസ്ക്
|

വിവാഹ ആഘോഷത്തിൻറെ ഭാഗമായി വരൻ വെടിയുതിർത്തതിനെത്തുടർന്ന് ഒരാൾ കൊല്ലപ്പെട്ടു. ഉത്തർപ്രദേശിലാണ് സംഭവം. സോനബദ്ര ജില്ലയിലെ വിവാഹ ആഘോഷത്തിനിടെയാണ് വരൻ മനീഷ് മധേശി വിവാഹ വെടിയുതിർത്തത്. വരന്റെ സുഹൃത്ത് ബാബു ലാൽ യാദവാണ് മരിച്ചത്. കൊല്ലപ്പെട്ട ബാബു സെെനികനാണ്.

ബാബുവിന്റെ തോക്കാണ് മനീഷ് ഉപയോഗിച്ചത്, സംഭവത്തിന്റെ ദൃശ്യങ്ങൾ പുറത്തുവന്നു. രഥം പോലെ അലങ്കരിച്ച വേദിയിൽ മനീഷ് നിൽക്കുന്നതും ആളുകൾ ചുറ്റും കൂടിനിൽക്കുന്നതും മനീഷ് വെടിയുതിർക്കുന്നതും ദൃശ്യങ്ങളിൽ വ്യക്തമാണ്.

വെടിയേറ്റയുടൻ തന്നെ ആശുപത്രിയിലെത്തിച്ചെങ്കിലും ബാബുവിനെ രക്ഷിക്കാനായില്ലെന്ന് പൊലീസ് പറഞ്ഞു. സംഭവത്തിൽ വരനെ അറസ്റ്റ് ചെയ്ത് എഫ്.ഐ.ആർ ഫയൽ ചെയ്തതായി പൊലീസ് അറിയിച്ചു. തോക്കും കണ്ടെടുത്തിട്ടുണ്ട്.

പൊതു ഇടങ്ങളിലും ആഘോഷ പരിപാടികളിലും തോക്ക് ഉപയോഗിക്കുന്നതിന് വിലക്കുള്ള സാഹചര്യത്തിലാണ് ഉത്തർപ്രദേശിൽ നിന്ന് ഇത്തരം വാർത്തകൾ റിപ്പോർട്ട് ചെയ്യപ്പെടുന്നത്.