ഇന്ത്യ-പാക് സംഘര്‍ഷം രൂക്ഷമാകുന്നതിനിടെ അവധിയിലുള്ള ഉദ്യോഗസ്ഥരോട് ജോലിയില്‍ തിരികെ പ്രവേശിക്കാന്‍ കേന്ദ്ര സര്‍ക്കാര്‍ നിര്‍ദ്ദേശിച്ചിരുന്നു. ഇതിന് പിന്നാലെ അവധിയിലായിരുന്ന ഒട്ടേറെ സൈനികര്‍ തിരികെ ജോലിയില്‍ പ്രവേശിച്ചിരുന്നു. ഇതിനിടെ അവധി റദ്ദാക്കി ജോലിയിലേക്ക് തിരികെ പ്രവേശിച്ച മധ്യപ്രദേശില്‍ നിന്നുള്ള ഐഎഎഫ് ഉദ്യോഗസ്ഥന്‍ ദേശീയ ശ്രദ്ധ നേടുകയാണ്.
മധ്യപ്രദേശിലെ രാജഗഢ് സ്വദേശിയായ മോഹിത് രാത്തോര്‍ എന്ന സൈനികനാണ് അവധി റദ്ദാക്കിയതിന് പിന്നാലെ രാജ്യ വ്യാപകമായി വാര്‍ത്തകളില്‍ ഇടം നേടുന്നത്. ഇസാപൂര്‍ എയര്‍ ഫോഴ്സ് സ്റ്റേഷനില്‍ സേവനം അനുഷ്ഠിക്കുന്ന മോഹിത് രാത്തോര്‍ എന്ന യുവസൈനികനാണ് നാടിനും വീടിനും അഭിമാനമായി മാറിയിരിക്കുന്നത്.
വിവാഹത്തിന് വേണ്ടിയായിരുന്നു മോഹിത് രാത്തോര്‍ അവധിയെടുത്തത്. എന്നാല്‍ വിവാഹം കഴിഞ്ഞ് മണിക്കൂറുകള്‍ക്കുള്ളില്‍ തിരികെ ജോലിയില്‍ പ്രവേശിച്ചാണ് മോഹിത് രാത്തോര്‍ രാജ്യത്തിന് അഭിമാനമായി മാറിയിരിക്കുന്നത്. ഏപ്രില്‍ 15 മുതല്‍ മെയ് 15 വരെ ആയിരുന്നു മോഹിത് രാത്തോര്‍ അവധി എടുത്തിരുന്നത്.
വ്യാഴാഴ്ചയായിരുന്നു മോഹിത് വിവാഹിതനായത്. പിന്നാലെ അവധി റദ്ദാക്കി ജോലിയിലേക്ക് തിരികെ പ്രവേശിക്കുകയായിരുന്നു. രാജ്യമാണ് വലുതെന്നും അതിനാല്‍ അവധി റദ്ദാക്കി മടങ്ങാന്‍ ആവശ്യപ്പെട്ടതില്‍ തനിക്ക് ദുഃഖമില്ലെന്നും മോഹിത് പ്രാദേശിക മാധ്യമങ്ങളോട് പറഞ്ഞു. വധു വന്ദനയും മറ്റ് കുടുംബാംഗങ്ങളും മോഹിതിന് പൂര്‍ണ പിന്തുണ നല്‍കി
ആറ് വര്‍ഷം മുന്‍പാണ് മോഹിത് വ്യോമസേനയുടെ ഭാഗമായത്. മോഹിത് സേനയുടെ ഭാഗമായി രാജ്യത്തെ സേവിക്കുന്നതില്‍ തങ്ങള്‍ അഭിമാനിക്കുന്നതായി മാതാപിതാക്കളും വ്യക്തമാക്കി.
Read more
