അമിതവേഗത്തില് എത്തിയ ബൈക്ക് തുണിക്കടയിലേയ്ക്ക് ഇടിച്ചു കയറി ആളുകളെ പരിഭ്രാന്തരാക്കി. തെലങ്കാനയിലെ ഖമ്മം ജില്ലയിൽ തിങ്കളാഴ്ച രാത്രി എട്ടരയോടെയാണ് സംഭവം.കടയിലെ സിസിടിവിയില് പതിഞ്ഞ ദൃശ്യങ്ങള് സോഷ്യല് മീഡിയകളിലൂടെ ഇപ്പോള് വൈറലായി കൊണ്ടിരിക്കുകയാണ്.
ഖമ്മത്തെ രവിച്ചേട്ടു ബസാറിലേക്കാണ് നിയന്ത്രണം തെറ്റിയെത്തിയ ബജാജ് പള്സര് മോട്ടോര് സൈക്കിള് ഇടിച്ചു കയറിയത്. കടയ്ക്കുള്ളില് ജീവനക്കാരടക്കം നാലുപേര് സംസാരിച്ചു നില്ക്കുന്നുണ്ടായിരുന്നു. ആര്ക്കും പരിക്കുകളില്ല. ഇടിയുടെ ശക്തിയില് വണ്ടി ഓടിച്ചയാള് കൗണ്ടറിന് മുകളിലൂടെ തെറിച്ചു വീഴുന്നതും, പിന്നീട് വലിയ പരിക്കുകളൊന്നുമില്ലാതെ എഴുന്നേറ്റ് വരുന്നതും വീഡിയോയില് വ്യക്തമായി കാണാം.
Read more
ബ്രേക്ക് നഷ്ടപ്പെട്ടതാണ് അപകട കാരണം. അപകടത്തില് പൊലീസ് കേസ് എടുക്കുകയും അപകടം ഉണ്ടാക്കിയ വണ്ടി പിടിച്ചെടുക്കുകയും ചെയ്തു.