രാഷ്ട്രപതി തിരഞ്ഞെടുപ്പില്‍ പ്രതിപക്ഷ സ്ഥാനാര്‍ത്ഥി യശ്വന്ത് സിന്‍ഹയെ പിന്തുണയ്ക്കുമെന്ന് ആം ആദ്മി പാര്‍ട്ടി അറിയിച്ചു. ജൂലൈ 18 നാണ് രാഷ്ട്രപതി തെരഞ്ഞെടുപ്പ് നടക്കുന്നത്.
എഎപി പ്രതിപക്ഷത്തിന്റെ സ്ഥാനാര്‍ത്ഥിയായ യശ്വന്ത് സിന്‍ഹയെ പിന്തുണയ്ക്കും. മുര്‍മുവിനെ ഞങ്ങള്‍ ബഹുമാനിക്കുന്നു. പക്ഷേ വോട്ട് യശ്വന്ത് സിന്‍ഹക്ക് ചെയ്യും. പാര്‍ട്ടിയുടെ രാഷ്ട്രീയ കാര്യ സമിതിക്ക് ശേഷം എഎപി എംപി സഞ്ജയ് സിംഗ് പറഞ്ഞു.
ഡല്‍ഹിയിലും പഞ്ചാബിലും രണ്ട് സംസ്ഥാനങ്ങളില്‍ സര്‍ക്കാരുകളുള്ള ഏക ബിജെപി, കോണ്‍ഗ്രസ് ഇതര സംഘടനയാണ് എഎപി. എഎപിയെ കൂടാതെ തെലങ്കാനയിലെ ഭരണകക്ഷിയായ ടിആര്‍എസും സംയുക്ത പ്രതിപക്ഷ സ്ഥാനാര്‍ത്ഥിയായ സിന്‍ഹക്ക് പിന്തുണ പ്രഖ്യാപിച്ചിട്ടുണ്ട്.
തിങ്കളാഴ്ച നടക്കുന്ന രാഷ്ട്രപതി തിരഞ്ഞെടുപ്പില്‍ അനായാസ ജയം ഉറപ്പിച്ചിരിക്കുകയാണ് ദ്രൗപദി മുര്‍മു. ബി.ജെ.ഡി, വൈ.എസ്.ആര്‍-സി.പി, ബി.എസ്.പി, എ.ഐ.എ.ഡി.എം.കെ, ടി.ഡി.പി, ജെ.ഡി-എസ്, ശിരോമണി അകാലിദള്‍, ശിവസേന, ജെ.എം.എം തുടങ്ങിയ പ്രാദേശിക പാര്‍ട്ടികളുടെ പിന്തുണകൂടി ഉറപ്പിച്ചതോടെ എന്‍.ഡി.എ സ്ഥാനാര്‍ഥി ദ്രൗപദി മുര്‍മുവിന്റെ വോട്ട് വിഹിതം മൂന്നില്‍ രണ്ട് ആകാന്‍ സാധ്യതയേറെയാണ്.
Read more
ആകെയുള്ള 10,86,431 വോട്ടുകളില്‍ ദ്രൗപദി ഇപ്പോള്‍ ഉറപ്പാക്കിയത് 6.67 ലക്ഷം വോട്ടുകളാണ്. ഇതില്‍, ബി.ജെ.പിയുടെയും സഖ്യകക്ഷികളുടെയും എം.പിമാരുടെ വോട്ടുമാത്രം 3.08 ലക്ഷം വരും.
