കർണാടകയിൽ വിവാഹ ചടങ്ങിനിടെ ഹിന്ദുക്കളുടെ മതവികാരം വ്രണപ്പെടുത്തിയെന്നാരോപിച്ച് മുസ്ലീം വരനും വധുവിന്റെ കുടുംബാംഗങ്ങൾക്കുമെതിരെ കേസെടുത്തു.
ബണ്ട്വാൾ താലൂക്കിലെ വിട്‌ല പഡ്‌നൂരു ഗ്രാമത്തിൽ നിന്നുള്ള ചേതൻ നൽകിയ പരാതിയുടെ അടിസ്ഥാനത്തിലാണ് കേസ്. വരൻ തുളുനാട് പ്രദേശത്തെ ഹിന്ദു ആൾദൈവമായ കൊറഗജ്ജയുടെ വേഷം ധരിച്ചു എന്നാണ് കേസെന്ന് പോലീസ് വൃത്തങ്ങൾ അറിയിച്ചു.
വ്യാഴാഴ്ച രാത്രി ബണ്ട്വാൾ താലൂക്കിലെ കോൾനാട് വില്ലേജിലെ സാലേത്തൂരിൽ അസീസിന്റെ വസതിയിൽ നടന്ന വിവാഹ ചടങ്ങിൽ പങ്കെടുക്കാനെത്തിയ മഞ്ചേശ്വരത്തിനടുത്തുള്ള ഉപ്പള സ്വദേശി ബാഷിത്താണ് കൊറഗജ്ജയുടെ വേഷം ധരിച്ചത്. ഇയാൾ അപകീർത്തിപ്പെടുത്തുന്ന തരത്തിൽ സുഹൃത്തുക്കൾക്കൊപ്പം നൃത്തം ചെയ്തു എന്നും പരാതിയിൽ പറയുന്നു.
യുവാക്കൾ നൃത്തത്തിന്റെ വീഡിയോ ക്ലിപ്പിംഗുകൾ സോഷ്യൽ മീഡിയ പ്ലാറ്റ്‌ഫോമുകളിൽ പ്രചരിപ്പിച്ചു, അത് പിന്നീട് വൈറലായി.
ഐപിസി സെക്ഷൻ 153 (എ) (വിവിധ വിഭാഗങ്ങൾക്കിടയിൽ ശത്രുത വളർത്തൽ), 295 (മതത്തെ അവഹേളിക്കുക എന്ന ഉദ്ദേശത്തോടെ ആരാധനാലയം അശുദ്ധമാക്കൽ) എന്നിവ പ്രകാരം ശിക്ഷാർഹമായ കുറ്റങ്ങൾക്കാണ് പൊലീസ് കേസ് രജിസ്റ്റർ ചെയ്തത്.
പ്രതികൾക്കെതിരെ കർശന നടപടി സ്വീകരിക്കണമെന്ന് വിശ്വഹിന്ദു പരിഷത്ത് (വിഎച്ച്പി) ജില്ലാ സെക്രട്ടറി ശിവാനന്ദ് മെൻഡൻ പ്രസ്താവനയിൽ ആവശ്യപ്പെട്ടു.
Read more
മുൻ സിറ്റി മേയറും ദക്ഷിണ കന്നഡ ജില്ലാ മുസ്‌ലിം ഫെഡറേഷൻ പ്രസിഡന്റുമായ കെ അഷ്‌റഫും ബാഷിത്തിന്റെയും മറ്റ് കുടുംബാംഗങ്ങളുടെയും പെരുമാറ്റത്തെ അപലപിച്ചു, അത്തരം പെരുമാറ്റം വിവാഹ സമയത്ത് മുസ്ലീങ്ങൾ പിന്തുടരുന്ന ആചാരങ്ങൾക്ക് വിരുദ്ധമാണെന്ന് പറഞ്ഞു. സാമുദായിക സംഘർഷം നിലനിൽക്കുന്ന പ്രദേശത്തെ ഒരു സമുദായത്തെയാണ് വരൻ ദൈവത്തെപ്പോലെ അണിഞ്ഞൊരുങ്ങി അപമാനിച്ചതെന്നും അദ്ദേഹം പറഞ്ഞു.
