കേരളത്തിലെ രണ്ടാമത്തെ പാര്‍ട്ടിയായി ടി20 മാറിയെന്ന് ചീഫ് കോഡിനേറ്റര്‍ സാബു എം ജേക്കബ്. 42 ദിവസം മുമ്പ് തുടങ്ങിയ അംഗത്വ ക്യാംപെയിനിലൂടെയാണ് കോണ്‍ഗ്രസിനെ മറികടന്ന് പ്രവര്‍ത്തകരുടെ എണ്ണത്തില്‍ രണ്ടാം സ്ഥാനത്ത് എത്തിയത്. കോണ്‍ഗ്രസിന് അഞ്ച് ലക്ഷം മെമ്പര്‍ഷിപ്പേ കേരളത്തിലുള്ളൂ, ഞങ്ങള്‍ ഇതുവരെ ഏഴ് ലക്ഷം അംഗത്വം നേടിക്കഴിഞ്ഞു. ഇനി മറികടക്കാന്‍ സിപിഎം മാത്രമെ മുന്നിലുള്ളൂവെന്നും സാബു ജേക്കബ് പറഞ്ഞു.
കേരളത്തിലെ എല്ലാ പഞ്ചായത്തുകളിലും വാര്‍ഡ് തലം തൊട്ട് പ്രവര്‍ത്തിച്ചുകൊണ്ടിരിക്കുകയാണ് ടി20. മാറ്റത്തിന് വേണ്ടി ആഗ്രഹിക്കുന്ന ജനങ്ങളാണ് ഞങ്ങള്‍ക്കൊപ്പം ചേര്‍ന്നത്. എല്‍ഡിഎഫിനേയും യുഡിഎഫിനേയും മാറി മാറി തെരഞ്ഞെടുക്കാന്‍ വിധിക്കപ്പെട്ട ജനങ്ങള്‍ ടി20ക്കൊപ്പം ചേര്‍ന്നെന്നും അദേഹം അവകാശപ്പെട്ടു.
Read more
ടി20 തെരഞ്ഞെടുപ്പില്‍ മത്സരിക്കുമ്പോള്‍ യുഡിഎഫിന്റെ വോട്ടുകളാണ് കൊണ്ടുപോകുന്നതെന്നാണ് പൊതുവിലുള്ള വിശ്വാസം. പക്ഷെ, അത് സത്യമല്ല. സിപിഐഎമ്മിന്റേയും കോണ്‍ഗ്രസിന്റേയും പ്രവര്‍ത്തകരില്‍ നിന്ന് തങ്ങള്‍ക്ക് പിന്തുണ ലഭിക്കുന്നുണ്ടെന്നും സാബു എം ജേക്കബ് അവകാശപ്പെട്ടു. കഴിഞ്ഞ തെരഞ്ഞെടുപ്പില്‍ കുന്നത്തുനാട് മണ്ഡലത്തില്‍ മാത്രമാണ് മത്സരിച്ചതെങ്കില്‍ ആ സീറ്റ് ഞങ്ങള്‍ക്ക് എളുപ്പത്തില്‍ വിജയിക്കാമായിരുന്നു. കൂടുതല്‍ സീറ്റുകളില്‍ ശ്രദ്ധ കേന്ദ്രീകരിച്ചപ്പോഴാണ് എല്ലായിടത്തും തോറ്റതെന്നും സാബു പറഞ്ഞു.
