"ജീവിച്ചിരിക്കുന്ന ടി.പിയെ പിണറായിക്ക് സഭയിൽ കാണാം": കെ.കെ രമ

 

കേരളത്തിൽ എൽ.ഡി.എഫ് നേടിയ വലിയ വിജയത്തിനിടയിലും വടകരയിലെ ആർ.എം.പിയുടെ വിജയം പിണറായി വിജയനെ അലോസരപ്പെടുത്തുമെന്ന് കെ.കെ രമ. കൊലപാതക രാഷ്ട്രീയത്തിനെതിരെ നിയമസഭയിൽ ശക്തമായി ശബ്ദമുയർത്തും. ജീവിച്ചിരിക്കുന്ന ടി.പിയെ സഭയിൽ പിണറായിക്ക് കാണാമെന്നും രമ പറഞ്ഞതായി ഏഷ്യാനെറ്റ് ന്യൂസ് റിപ്പോർട്ട് ചെയ്തു. ടി.പി ചന്ദ്രശേഖരന്റെ രക്തസാക്ഷി ദിനമായ ഇന്ന് ഒഞ്ചിയത്തെ വീട്ടിൽ അനുസ്മരണ പരിപാടികൾ നടന്നിരുന്നു. കെ കെ.രമയുടെ നിയമസഭയിലേക്കുള്ള ചരിത്രവിജയത്തിന് പിന്നാലെയാണ് ടി.പിയുടെ ഓർമ്മദിവസം.

മനുഷ്യന് ജീവിക്കാനുള്ള അവകാശമാണ് വേണ്ടത്. അക്രമ രാഷ്ട്രീയത്തിനെതിരെയുള്ള വിധിയെഴുത്താണ് വടകരയിൽ ഉണ്ടായിരിക്കുന്നത്. എതിരഭിപ്രായം പറയുന്നവരെ കൊന്നുതള്ളുന്നവർക്കെതിരെ പോരാടും. ടി.പിയ്ക്ക് സമർപ്പിക്കാനുള്ള വിജയമാണിത്. ഒരാശയത്തെയാണ് സിപിഎം ഇല്ലാതാക്കാൻ നോക്കിയത്. ആർഎംപിയുടെ രാഷ്ട്രീയത്തിന് കൂടുതൽ പ്രസക്തിയുണ്ടെന്നും കെ.കെ രമ പറഞ്ഞു.