നിലവിലെ സ്ഥിതിയില് പോയാല് സംസ്ഥാനത്ത് വീണ്ടും മാര്ക്സിസ്റ്റ് പാര്ട്ടി അധികാരത്തിലേറുമെന്ന് കോണ്ഗ്രസ് നേതാവും തിരുവനന്തപുരം ഡിസിസി പ്രസിഡന്റുമായ പാലോട് രവി. മൂന്നാമതും എല്ഡിഎഫ് അധികാരത്തിലേറുമെന്നും അതോടെ കോണ്ഗ്രസ് പാര്ട്ടിയുടെ അധോഗതിയാകുമെന്നും തിരുവനന്തപുരം ഡിസിസി പ്രസിഡന്റ് പാലോട് രവി ഫോണ്സംഭാഷണത്തില് പറയുന്ന ഓഡിയോ പുറത്തായി. പഞ്ചായത്ത് തിരഞ്ഞെടുപ്പിലും കോണ്ഗ്രസ് പാര്ട്ടി മൂന്നാം സ്ഥാനത്ത് പോകുമെന്നും നിയമസഭയില് ഉച്ചികുത്തി താഴെ വീഴുമെന്നുമാണ് കോണ്ഗ്രസിനുള്ളിലെ ഗ്രൂപ്പ് പോരും തര്ക്കവുമെല്ലാം അപഗ്രഥിച്ച് പാലോട് രവി പറയുന്നത്. കോണ്ഗ്രസിനുള്ള തര്ക്കങ്ങളിലും പ്രവര്ത്തനരീതികളിലും ആശങ്കപ്പെട്ട് പാര്ട്ടി പ്രാദേശിക നേതാവുമായുള്ള ഫോണ് സംഭാഷണത്തിലാണ് സംസ്ഥാനത്ത് പാര്ട്ടി മൂന്നാം സ്ഥാനത്ത് ബിജെപിയ്ക്ക് പിന്നിലും പോകുമെന്ന് പാലോട് രവി പറയുന്നത്.
അടുത്ത നിയമസഭാ തിരഞ്ഞെടുപ്പില് 60 മണ്ഡലങ്ങളില് ബിജെപി കടന്നുകയറ്റം നടത്തുമെന്ന പ്രവചനവും പാലോട് രവി നടത്തുന്നുണ്ട്. പാര്ലമെന്റ് തിരഞ്ഞെടുപ്പില് ബിജെപി കാശ്കൊടുത്ത് വോട്ട് വാങ്ങിച്ചതുപോലെ നിയമസഭയിലും അവര് വോട്ട് പിടിക്കുമെന്നും കോണ്ഗ്രസ് മൂന്നാമതാകുമെന്നുമാണ് പാലോട് രവി പറയുന്നത്. മുസ്ലിം വിഭാഗത്തിലുള്ളവര് സിപിഎമ്മിലേക്കും മറ്റു പാര്ട്ടികളിലേക്കും ചേക്കേറുമെന്നും മറ്റുചിലര് ബിജെപിയിലേക്ക് പോകുമെന്നും പാലോട് രവി ചൂണ്ടിക്കാണിക്കുന്നു. പഞ്ചായത്ത് തിരഞ്ഞെടുപ്പും നിയമസഭാ തിരഞ്ഞെടുപ്പും കഴിയുമ്പോള് കോണ്ഗ്രസ് എടുക്കാ ചരക്കാകുമെന്ന് പറയുന്ന മുതിര്ന്ന കോണ്ഗ്രസ് നേതാവ് വോട്ടര്മാരുടെ വീട്ടിലും ചെന്ന് പരാതികള് കേട്ട് പരിഹാരവും ചങ്ങാത്തവും ഉണ്ടാക്കണമെന്നും നിര്ദേശിക്കുന്നുണ്ട്.
പാര്ട്ടിയിലെ തര്ക്കങ്ങള് ചൂണ്ടിക്കാട്ടി പഞ്ചായത്ത് തിരഞ്ഞെടുപ്പിലും നിയമസഭാ തിരഞ്ഞെടുപ്പിലും കോണ്ഗ്രസ് മൂന്നാം സ്ഥാനത്തേക്ക് പോകുമെന്ന് പറഞ്ഞു പ്രാദേശിക നേതാവുമായി തന്റെ ആശങ്ക പങ്കുവെയ്ക്കുന്ന പാലോട് രവിയുടെ ചോര്ന്ന സംഭാഷണത്തിലെ ഭാഗങ്ങള് ഇങ്ങനെയാണ്.
Read more
‘പഞ്ചായത്ത് തിരഞ്ഞെടുപ്പിലും മൂന്നാം സ്ഥാനത്ത് പോകും. നിയമസഭയില് ഉച്ചികുത്തി താഴെ വീഴും. നീ നോക്കിക്കോ 60 നിയമസഭാ മണ്ഡലത്തില് ബിജെപി എന്ത് ചെയ്യാന് പോകുന്നുവെന്ന്. പാര്ലമെന്റ് തിരഞ്ഞെടുപ്പില് കാശ്കൊടുത്ത് വോട്ട് വാങ്ങിച്ചതുപോലെ നിയമസഭയിലും അവര് വോട്ട് പിടിക്കും. കോണ്ഗ്രസ് മൂന്നാമതാകും. മാര്ക്സിസ്റ്റ് പാര്ട്ടി മൂന്നാമതും ഭരണത്തിലേറും. അതോടുകൂടി ഈ പാര്ട്ടിയുടെ അധോഗതിയാകും. മുസ്ലിം വിഭാഗത്തിലുള്ളവര് സിപിഎമ്മിലേക്കും മറ്റു പാര്ട്ടികളിലേക്കും ചേക്കേറും. മറ്റുചിലര് ബിജെപിയിലേക്ക് പോകും. പഞ്ചായത്ത് തിരഞ്ഞെടുപ്പും നിയമസഭാ തിരഞ്ഞെടുപ്പും കഴിയുമ്പോള് കോണ്ഗ്രസ് എടുക്കാ ചരക്കാകും. നാട്ടില് ഇറങ്ങി നടന്ന് ജനങ്ങളുമായി സംസാരിക്കാന് പത്ത് ശതമാനം സ്ഥലങ്ങളിലേ ആളുള്ളൂ. ഇത് മനസ്സിലാക്കാതെയാണ് നമ്മളൊക്കെ വീരവാദം പറഞ്ഞുനടക്കുന്നത്. ഈ പാര്ട്ടിയെ ഓരോ ഗ്രൂപ്പും താത്പര്യങ്ങളും പറഞ്ഞ് തകര്ക്കുന്നതിന്റെ ഉത്തരവാദിത്തം ഉണ്ടാകണം. ഒറ്റയെണ്ണത്തിന് പരസ്പരം ആത്മാര്ത്ഥമായി സ്നേഹമോ ബന്ധമോ ഇല്ല. എങ്ങനെ കാലുവരാമെന്നാണ് നോക്കുന്നത്. ഒരുത്തനും ഒരുത്തനെ അംഗീകരിക്കാന് തയ്യാറല്ല’ പാലോട് രവി പറഞ്ഞു.
