ദേശീയ തിരഞ്ഞെടുപ്പില്‍ വിവിധ സംസ്ഥാനങ്ങളിലെ കോണ്‍ഗ്രസിന്റെ സഖ്യം പൊളിച്ചത് എ. കെ ആന്റണിയാണെന്ന പ്രചാരണങ്ങള്‍ക്ക് മറുപടിയുമായി മകന്‍ അജിത് പോള്‍ ആന്റണി.
രണ്ട് സീറ്റില്‍ കൂടുതല്‍ നല്‍കില്ലെന്ന് മായാവതി വാശി പിടിച്ചതു കൊണ്ടാണ് യു.പിയില്‍ സഖ്യം സാധ്യമാകാത്തതെന്നും, ഡല്‍ഹിയില്‍ ആം ആദ്മിയുടെ പിടിവാശിയായിരുന്നു കാരണമെന്നും അജിത് ഫെയ്‌സ് ബുക്ക് പോസ്റ്റില് പറയുന്നു. ആന്ധ്രയില്‍ ജഗന്‍ മോഹന്‍ റെഡ്ഢിയുടെ കാര്യവും അജിത് പരാമര്‍ശിക്കുന്നുണ്ട്. നരേന്ദ്ര മോദി നയിക്കുന്ന എന്‍ഡിഎ മുന്നണിയെ പിടിച്ച് കെട്ടാന്‍ വിവിധ സംസ്ഥാനങ്ങളിലെ സഖ്യരൂപീകരണത്തിന് ചുമതലയുള്ള കോണ്‍ഗ്രസിലെ പ്രധാനിയായിരുന്നു എ. കെ ആന്റണി.
ഇല്ലാക്കഥകള്‍ പ്രചരിപ്പിക്കുന്നതിന് പിന്നില്‍ ആക്ഷേപിക്കുക എന്ന ഉദ്ദേശ്യം മാത്രമെ ഉള്ളുവെന്നും തീയില്‍ കുരുത്തത് വെയിലത്ത് വാടില്ലെന്നും പോസ്റ്റില് പറയുന്നുണ്ട്.
ഫെയ്‌സ് ബുക്ക് പോസ്റ്റിന്റെ പൂര്‍ണരൂപം
നമസ്കാരം സുഹൃത്തുക്കളേ, അടുത്തിടയായി അടിസ്ഥാനമില്ലാത്ത കുറെ വാർത്തകൾ പ്രചരിപ്പിക്കുന്നുണ്ട്. സത്യവുമായി പുലബന്ധം പോലുമില്ലാത്ത കാര്യങ്ങൾ ആണ് പ്രചരിപ്പിക്കുന്നത്. ഒന്നാമത്തെ ആരോപണം – യു.പിയിലെ സഖ്യം യാഥാർത്ഥ്യം ആകാത്തതിന്റെ കാരണം എന്റെ അച്ഛൻ ആണെന്ന്. സത്യത്തിൽ കോൺഗ്രസ് സഖ്യത്തിന് തയ്യാറായിരുന്നു പക്ഷെ മായാവതി രണ്ടു സീറ്റിൽ കൂടുതൽ കോൺഗ്രസിന് തരില്ല എന്ന് വാശി പിടിച്ചു. അതുകൊണ്ട് തന്നെ ഒറ്റയ്ക്കു മത്സരിക്കാൻ കോൺഗ്രസ് തീരുമാനിച്ചു. മറ്റൊന്ന്. ഡൽഹിയിൽ സഖ്യത്തിന് കോൺഗ്രസ് തയ്യാറായിരുന്നു. പക്ഷെ ഒരു സീറ്റ് അല്ലെങ്കിൽ രണ്ടെണ്ണം മാത്രം കോൺഗ്രസിന്. ഒരു ഘട്ടത്തിൽ കോൺഗ്രസ് അത് സമ്മതിച്ചതുമാണ്. അപ്പോഴാണ് ആപ് ഡിമാൻഡ് മാറ്റി പഞ്ചാബിലും ഹരിയാനയിലും സീറ്റ് ആവശ്യപ്പെട്ടത്. പിന്നൊന്ന്‌ ആന്ധ്രയെ സംബന്ധിച്ചാണ്. ആന്ധ്രയിൽ ജഗൻ മോഹൻ റെഡ്‌ഡി കോൺഗ്രസിന് 10 സീറ്റ് കൊടുക്കാൻ തയ്യാറായി എന്ന്. ജഗൻമോഹൻ റെഡ്ഢി അത്തരമൊരു സമ്മതം നടത്തിയതായി ഒരറിവും ഇല്ല. അപ്പോൾ പിന്നെ ഈ ഇല്ലാക്കഥകൾ പ്രചരിപ്പിക്കുന്നതെന്തിന്? വെറുതെ ആക്ഷേപിക്കുക. അത്രതന്നെ. അത്തരക്കാരോട് ഒന്നേ പറയാനുള്ളൂ… തീയിൽ കുരുത്തത് വെയിലത്ത് വാടില്ല. ഇല്ലാക്കഥകൾ പ്രചരിപ്പിച്ചു തളർത്താമെന്നു ആരെങ്കിലും വ്യാമോഹിക്കുന്നുവെങ്കിൽ ഒരുകാര്യം മനസിലാക്കിക്കോളൂ…. അതെല്ലാം വെറും വ്യാമോഹം മാത്രമായിരിക്കും.
Read more
https://www.facebook.com/ajith.p.antony/posts/10156531603823519
