വിഴിഞ്ഞം സമരത്തിന് പിന്നില്‍ രഹസ്യ അജണ്ട, അന്താരാഷ്ട്ര ഗൂഢാലോചനയെന്ന് സംശയമുണ്ടെന്ന് മന്ത്രി അഹമ്മദ് ദേവര്‍കോവില്‍

 

വിഴിഞ്ഞം തുറമുഖ സമരത്തിന് പിന്നില്‍ ഒരു രഹസ്യ അജണ്ടയുണ്ടെന്ന് തുറമുഖ വകുപ്പ് മന്ത്രി അഹമ്മദ് ദേവര്‍കോവില്‍. സമരത്തില്‍ പ്രദേശവാസികളില്ല. അവര്‍ക്ക് പദ്ധതി നടപ്പാക്കണം എന്നാണ് ആഗ്രഹം. ഇതിന് പിന്നില്‍ അന്താരാഷ്ട്ര ഗൂഢാലോചനയുണ്ടോ എന്ന് സംശയിക്കേണ്ടിയിരിക്കുന്നു.

വിഴിഞ്ഞം പദ്ധതി നിര്‍ത്തിവെക്കണം എന്ന ആവശ്യം അംഗീകരിക്കാനാവില്ലെന്നും മന്ത്രി ദുബായില്‍ പറഞ്ഞു.അതേസമയം വിഴിഞ്ഞം സമരക്കാരുമായി ഇന്ന് മന്ത്രിസഭാ ഉപസമിതി വീണ്ടു ചര്‍ച്ച നടത്തും. 11 മണിക്കാണ് ചര്‍ച്ച.

മന്ത്രിമാരായ കെ രാജന്‍, വി അബ്ദുറഹ്‌മാന്‍, ശിവന്‍കുട്ടി, ആന്റണി രാജു, ജി ആര്‍ അനില്‍ എന്നിവര്‍ ചര്‍ച്ചയ്ക്ക് നേതൃത്വം നല്‍കും. സമരക്കാരുമായി ് നാലാം വട്ടമാണ് മന്ത്രിസഭാ ഉപസമിതി ചര്‍ച്ചനടത്തുന്നത്. തുറമുഖ കവാടത്തിന് മുന്നിലെ സമരപന്തല്‍ പൊളിക്കണം എന്ന ജില്ലാ ഭരണകൂടത്തിന്റെ ഉത്തരവ് യോഗത്തില്‍ സമരക്കാര്‍ ഉന്നയിക്കും.

അതേസമയം, വിഴിഞ്ഞം തുറമുഖ നിര്‍മാണം നിര്‍ത്തിവെക്കണമെന്നാവശ്യപ്പെട്ട് നടത്തുന്ന സമരം പരഹരിക്കുന്നതിന് കേന്ദ്രത്തിന്റെ ഇടപെടലിന് ഗവര്‍ണര്‍ ആരിഫ് മുഹമ്മദ് ഖാന്‍ ഉറപ്പ് നല്‍കിയതായി സമര സമിതി അറിയിച്ചിരുന്നു.

തങ്ങളുടെ പരാതികള്‍ ഗവര്‍ണര്‍ അനുഭാവ പൂര്‍വ്വം കേട്ടെന്ന് ലത്തീന്‍ അതിരൂപത പ്രതിനിധി ഫ. യൂജീന്‍ പെരേര പറഞ്ഞു. ഗവര്‍ണറുമായി സമര സമിതി നടത്തിയ കൂടിക്കാഴ്ചക്ക് ശേഷം പ്രതികരിക്കുകയായിരുന്നു അദ്ദേഹം.