പൊതുജനങ്ങളുടെ യാത്രാ അനുഭവം മെച്ചപ്പെടുത്താന്‍ ലക്ഷ്യമിട്ട് പാസഞ്ചര്‍ ഇന്‍ഫര്‍മേഷന്‍ സിസ്റ്റങ്ങള്‍ സ്ഥാപിക്കാനൊരുങ്ങി കെഎസ്ആര്‍ടിസി. കൊച്ചി മെട്രോയില്‍ നിലവിലുള്ള അലേര്‍ട്ട് സൗകര്യങ്ങള്‍ ഉള്‍പ്പെടെ പാസഞ്ചര്‍ ഇന്‍ഫര്‍മേഷന്‍ സിസ്റ്റത്തില്‍ ഉള്‍പ്പെടുത്തുമെന്നാണ് വിവരം. 400 ഓര്‍ഡിനറി ബസുകളിലും 100 സൂപ്പര്‍ ഫാസ്റ്റ് ബസുകളിലുമാണ് ആദ്യഘട്ടത്തില്‍ പരീക്ഷണാടിസ്ഥാനത്തില്‍ പാസഞ്ചര്‍ ഇന്‍ഫര്‍മേഷന്‍ സിസ്റ്റം സ്ഥാപിക്കുക.
ഇതിനായി കെഎസ്ആര്‍ടിസി രണ്ട് വര്‍ഷത്തേക്ക് ടെന്‍ഡര്‍ വിളിച്ചിട്ടുണ്ട്. ഓഡിയോ-വിഷ്വല്‍ വിവരങ്ങളോടുകൂടിയ ഇന്റഗ്രേറ്റഡ്-ഓട്ടോമേറ്റഡ് പാസഞ്ചര്‍ ഇന്‍ഫര്‍മേഷന്‍ സിസ്റ്റം ഇന്‍സ്റ്റാള്‍ ചെയ്യുന്നതിനും പ്രവര്‍ത്തിപ്പിക്കുന്നതിനുമുള്ള ലൈസന്‍സ് രണ്ട് വര്‍ഷത്തേക്ക് നല്‍കുന്നതിനായാണ് ടെന്‍ഡര്‍ ക്ഷണിച്ചിരിക്കുന്നത്. വാര്‍ഷികാടിസ്ഥാനത്തില്‍ മൂന്ന് വര്‍ഷത്തേക്ക് കൂടി നീട്ടി ലഭിക്കും. ഓഡിയോ സിസ്റ്റത്തില്‍ പ്രധാനമായും സ്പീക്കറുകളാണ് ഉള്ളത്. ബസുകള്‍ക്കുള്ളില്‍ ഒന്നോ അതിലധികമോ സ്ഥലങ്ങളില്‍ ഡിജിറ്റല്‍ ഡിസ്പ്ലേകളും സ്ഥാപിക്കുന്നതാണ്.
സര്‍ക്കാര്‍ അധികാരികള്‍ പുറത്തിറക്കുന്ന വിവിധ പൊതു വിവരങ്ങളും ഈ സംവിധാനത്തിലൂടെ സംപ്രേഷണം ചെയ്യും. പരസ്യങ്ങള്‍ക്ക് പുറമേ ബോധവല്‍ക്കരണ സന്ദേശങ്ങള്‍, പകര്‍പ്പവകാശമുളള സിനിമാ ഗാനങ്ങള്‍, സിനിമാ രംഗങ്ങള്‍ തുടങ്ങിയവയും കരാറുകാര്‍ക്ക് പ്ലേ ചെയ്യാവുന്നതാണ്. ബസുകളുടെ എത്തിച്ചേരല്‍/പുറപ്പെടല്‍ സമയങ്ങള്‍, റൂട്ടുകള്‍, സ്റ്റോപ്പുകള്‍ എന്നിവയെക്കുറിച്ചുള്ള തത്സമയ വിവരങ്ങള്‍ ഈ സംവിധാനത്തിലൂടെ യാത്രക്കാര്‍ക്ക് അറിയാനാകും.
Read more
ബസുകളില്‍ ജിപിഎസ് ഉപകരണങ്ങള്‍ ഘടിപ്പിച്ച് ഒരു സെന്‍ട്രല്‍ സെര്‍വറുമായി ബന്ധിപ്പിച്ചാണ് സംവിധാനം പ്രവര്‍ത്തിക്കുക. സെന്‍ട്രല്‍ സെര്‍വറില്‍ നിന്നുള്ള ഡാറ്റ പിഐഎസ് ഡിസ്പ്ലേകളിലേക്ക് ലഭ്യമാക്കുന്നത് വഴിയാണ് തത്സമയ വിവരങ്ങള്‍ അപ്‌ഡേറ്റ് ചെയ്യുന്നത്.
