നടിയെ ആക്രമിച്ച കേസില്‍ അന്വേഷണം പുരോഗമിച്ചു കൊണ്ടിരിക്കുന്ന സാഹചര്യത്തില്‍ എ.ഡി.ജി.പി ശ്രീജിത്തിനെ മാറ്റിയതില്‍ ആശങ്കപ്പെടേണ്ടതില്ലെന്ന് വനിതാ കമ്മീഷന്‍ അധ്യക്ഷ പി സതീദേവി. എസ് ശ്രീജിത്ത് അന്വേഷണ ഉദ്യോഗസ്ഥനല്ല, മേല്‍നോട്ട ചുമതല മാത്രമാണ് അദ്ദേഹത്തിനുള്ളതെന്നും സതീദേവി പറഞ്ഞു.
സ്ത്രീപീഡന കേസുകളില്‍ നയംമാറ്റം ഉണ്ടായിട്ടില്ല. പൊലീസില്‍ ഉദ്യോഗസ്ഥരെ സ്ഥാനം മാറ്റുന്നത് പതിവ് കാര്യമാണ്. ശ്രീജിത്തിനെ മാത്രമല്ല, മറ്റു ഉദ്യോഗസ്ഥരെയും മാറ്റിയിട്ടുണ്ട്. സ്ഥാനമാറ്റം ഉയര്‍ത്തിക്കാട്ടി മാധ്യമങ്ങള്‍ വിവാദമുണ്ടാക്കാന്‍ ശ്രമിക്കുകയാണ്. വിഷയത്തില്‍ ഡബ്ലുസിസിയുടെ ആശങ്കയ്ക്ക് അടിസ്ഥാനമില്ലെന്നും വനിതാ കമ്മീഷന്‍ അധ്യക്ഷ പറഞ്ഞു.
ശ്രീജിത്തിന്റെ സ്ഥാനമാറ്റം കേസ് അട്ടിമറിക്കാന്‍ ശ്രമിക്കുന്നതിന്റെ തെളിവാണ്. എല്ലാ പ്രതീക്ഷകളെയും അട്ടിമറിക്കും വിധമാണ് പൊലീസ് തലപ്പത്ത് നടന്ന അഴിച്ചുപണിയെന്നും ഇത് സിനിമകളിലെ ആന്റിക്ലൈമാക്‌സ് രംഗം പോലെ നിരാശാജനകമാണെന്നും കഴിഞ്ഞ ദിവസം ഡബ്ലുസിസി പ്രതികരിച്ചിരുന്നു.
Read more
അതേസമയം നടിയെ ആക്രമിച്ച കേസില്‍ ദിലീപിന്റെ ജാമ്യം റദ്ദാക്കണമെന്ന അപേക്ഷയില്‍ ക്രൈം ബ്രാഞ്ച് കൂടുതല്‍ തെളിവുകള്‍ വിചാരണക്കോടതിക്ക് കൈമാറി. സാക്ഷികളെ സ്വാധീനിക്കാന്‍ ശ്രമിച്ചതിന്റെ ശബ്ദരേഖയടക്കം കോടതിയില്‍ സമര്‍പ്പിച്ചിട്ടുണ്ട്. ഹര്‍ജി ഈ മാസം 26ന് പരിഗണിക്കും.
