തന്റെ ഏറ്റവും പുതിയ ചിത്രത്തിന്റെ ഷൂട്ടിംഗ് പൂര്‍ത്തിയാക്കിയിരിക്കുകയാണ് മമ്മൂട്ടി. ജിയോ ബേബിയുടെ സംവിധാനത്തിലെത്തുന്ന ഈ ചിത്രത്തിന്റെ പേര് കാതല്‍ എന്നാണ്. മമ്മൂട്ടി കമ്പനിയുടെ ബാനറില്‍ മമ്മൂട്ടി തന്നെ നിര്‍മ്മിച്ച ഈ ചിത്രത്തില്‍ ജ്യോതികയാണ് നായിക.

കാതലിന് ശേഷം മമ്മൂട്ടി ചെയ്യാന്‍ പോകുന്നത് മമ്മൂട്ടി കമ്പനി തന്നെ നിര്‍മ്മിക്കുന്ന ഒരു ത്രില്ലര്‍ ചിത്രമാണെന്നും, പ്രശസ്ത ക്യാമറാമാന്‍ റോബി വര്‍ഗീസ് രാജ് സംവിധായകനായി അരങ്ങേറ്റം കുറിക്കുന്ന ഈ ചിത്രം ജനുവരിയില്‍ ആണ് ആരംഭിക്കുകയെന്നും വാര്‍ത്തകള്‍ വരുന്നുണ്ട്.

എന്നാല്‍ ഏറ്റവും പുതിയ റിപ്പോര്‍ട്ടുകള്‍ പ്രകാരം ് അതിനു മുന്‍പ് മമ്മൂട്ടി ഒരു വെബ് സീരിസിന്റെ ഭാഗമായേക്കാം. ഒഫീഷ്യല്‍ ആയി സ്ഥിതീകരിച്ചിട്ടില്ലെങ്കിലും കാക്കമുട്ടൈ ഫെയിം മണികണ്ഠന്‍ ഒരുക്കാന്‍ പോകുന്ന പുതിയ വെബ് സീരിസില്‍ മമ്മൂട്ടി ഒരു നിര്‍ണ്ണായക വേഷം ചെയ്‌തേക്കാം.

വിജയ് സേതുപതിയാണ് ഈ വെബ് സീരീസിലെ നായകനായി എത്തുന്നത്. ഡിസ്നി പ്ലസ് ഹോട്ട് സ്റ്റാര്‍ നിര്‍മ്മിക്കാന്‍ പോകുന്ന ഈ ബിഗ് ബഡ്ജറ്റ് വെബ് സീരിസിന്റെ ഔദ്യോഗിക പ്രഖ്യാപനം ഉടനെ ഉണ്ടാകുമെന്നാണ് സൂചന. വിജയ് സേതുപതി ആണ് ഇതില്‍ നായകനെന്ന വിവരം ഏകദേശം ഉറപ്പായിട്ടുണ്ട്. മമ്മൂട്ടി ഇതിന്റെ ഭാഗമാകുമോ എന്നറിയാനുള്ള ആകാംക്ഷയിലാണ് പ്രേക്ഷകര്‍.

ഇത് കൂടാതെ സിദ്ദിഖ് സംവിധാനം ചെയ്യാന്‍ പോകുന്ന പുതിയ ചിത്രത്തിലും മമ്മൂട്ടിയാണ് നായകനെന്നാണ് സൂചന. ബി ഉണ്ണികൃഷ്ണന്‍ ഒരുക്കിയ ക്രിസ്റ്റഫര്‍, ലിജോ ജോസ് പെല്ലിശ്ശേരി ഒരുക്കിയ നന്‍ പകല്‍ നേരത്ത് മയക്കം, തെലുങ്ക് ചിത്രം ഏജന്റ് എന്നിവയാണ് മമ്മൂട്ടിയഭിനയിച്ച് ഇനി റിലീസ് ചെയ്യാനുള്ള ചിത്രങ്ങള്‍.